शोपियान :

जम्मू-काश्मीरमधील शोपियान जिल्ह्यात सुरक्षा दलांनी राबवलेल्या एका मोठ्या संयुक्त मोहिमेत 'लष्कर-ए-तैयबा' या दहशतवादी संघटनेच्या एका दहशतवाद्याला कंठस्नान घालण्यात यश आले आहे. शोपियानचे विशेष ऑपरेशन ग्रुप (SOG), भारतीय लष्कराची राष्ट्रीय रायफल्स (RR) आणि सीआरपीएफ (CRPF) यांनी संयुक्तपणे ही धडक कारवाई केली.

ठार झालेल्या दहशतवाद्याची ओळख पटवण्याचे काम सध्या प्रशासनाकडून सुरू आहे. चकमकीच्या ठिकाणाहून काही अंतरावर मोठ्या प्रमाणावर शस्त्रे आणि दारूगोळा पडलेला दिसून आला असून तो जप्त करण्यात आला आहे.

"तुम्ही पळू शकता, पण लपू शकत नाही!"

या यशस्वी कामगिरीनंतर जम्मू-काश्मीर पोलिसांनी सोशल मीडिया प्लॅटफॉर्म 'X' वर एक पोस्ट शेअर करत दहशतवाद्यांना कडक इशारा दिला आहे. पोलिसांनी आपल्या पोस्टमध्ये लिहिले, "तुम्ही पळू शकता, पण लपू शकत नाही! एसओजी शोपियान, राष्ट्रीय रायफल्स आणि सीआरपीएफच्या संयुक्त मोहिमेत लष्करच्या एका दहशतवाद्याचा खात्मा करण्यात आला आहे."

पोलीस सूत्रांनी दिलेल्या माहितीनुसार, शोध मोहीम सुरू असताना अचानक गोळीबाराचा आवाज ऐकू आला. सुरक्षा दलांनी या गोळीबाराला चोख प्रत्युत्तर दिले. दोन्ही बाजूंनी झालेल्या या जोरदार गोळीबारानंतर शोपियानच्या चानापोरा भागातील चकमकीच्या ठिकाणावरून या दहशतवाद्याचा मृतदेह ताब्यात घेण्यात आला.

परिसरात कडक बंदोबस्त अन् शोध मोहीम

या चकमकीनंतर सुरक्षा दलांनी संपूर्ण परिसराला वेढा घातला असून शोध मोहीम अधिक तीव्र केली आहे. परिसरात अजूनही काही दहशतवादी लपून बसल्याची शंका असल्याने सुरक्षा दलांचे जवान सावधगिरी बाळगत आहेत. जम्मू-काश्मीरमध्ये दहशतवादाचा बिमोड करण्यासाठी सुरक्षा दलांकडून सातत्याने अशा मोहिमा राबवल्या जात आहेत.

राजौरीमध्ये 'ऑपरेशन शेरूवाली'चा धडाका

यापूर्वी जम्मू-काश्मीरच्या राजौरी जिल्ह्यातही सुरक्षा दलांनी 'ऑपरेशन शेरूवाली' अंतर्गत मोठी मोहीम हाती घेतली होती. मांजाकोट सेक्टरमधील गंभीर मुघलान परिसरातील दोरीमल येथील घनदाट जंगलात ही मोहीम राबवण्यात आली होती. जंगलात लपलेल्या दहशतवाद्यांचा माग काढणे हा या मोहिमेचा मुख्य उद्देश होता.

मे महिन्याच्या शेवटी सुरू झालेले हे 'ऑपरेशन शेरूवाली' म्हणजे दुर्गम डोंगराळ भागात आणि घनदाट जंगलात लपलेल्या सशस्त्र घुसखोरांचा शोध घेऊन त्यांचा खात्मा करण्यासाठी राबवलेले एक मोठे मोहीम आहे. आधुनिक उपकरणांच्या मदतीने सुरक्षा दलांचे जवान या भागात सतत पाळत ठेवून आहेत.