पंतप्रधान नरेंद्र मोदी सध्या तीन देशांच्या दौऱ्यावर आहेत. या दौऱ्याच्या पहिल्या टप्प्यात ते इंडोनेशियाची राजधानी जकार्ता इथं पोहोचले. तिथे इंडोनेशियाचे राष्ट्राध्यक्ष प्रबोवो सुबियांतो यांनी त्यांचं जंगी स्वागत केलं. या ऐतिहासिक भेटीदरम्यान इंडोनेशिया सरकारने पंतप्रधान मोदींना देशातील सर्वोच्च नागरी सन्मान 'बिंतांग आदिपूर्णा' (Bintang Adipurna) प्रदान करून गौरवलं. दोन्ही देशांमधील संबंध मजबूत करण्यासाठी मोदींनी दिलेल्या अतुलनीय योगदानाचा हा गौरव मानला जात आहे.

हा सन्मान भारताच्या जनतेला समर्पित!

पुरस्कार स्वीकारल्यानंतर पंतप्रधान मोदींनी भावूक शब्दांत आपल्या भावना व्यक्त केल्या. "आज सकाळी मला अतिशय प्रेमाने इंडोनेशियाच्या सर्वोच्च सन्मानाने गौरवण्यात आलं. हा सन्मान माझा नसून तो कोट्यवधी भारतीयांचा आहे. हा पुरस्कार इंडोनेशियातील जनतेच्या भावना आणि भारत-इंडोनेशिया यांच्यातील ऐतिहासिक व जिव्हाळ्याच्या संबंधांचं प्रतीक आहे," असं पंतप्रधान मोदी म्हणाले.

याशिवाय त्यांनी राष्ट्राध्यक्ष प्रबोवो, इंडोनेशिया सरकार आणि तिथल्या जनतेचे मनापासून आभार मानले. जागतिक परिस्थितीवर भाष्य करताना त्यांनी भारताची शांततापूर्ण भूमिका जगासमोर मांडली. "सध्याच्या अस्थिर जागतिक परिस्थितीत संवाद आणि मुत्सद्देगिरी खूप महत्त्वाची बनली आहे. दोन्ही देशांसाठी एक सुवर्णकाळ खुणावतोय," असा भक्कम विश्वास पंतप्रधानांनी व्यक्त केला.

परराष्ट्र मंत्री एस. जयशंकर यांची प्रतिक्रिया

भारताचे परराष्ट्र मंत्री एस. जयशंकर यांनीही या सन्मानाबद्दल मोठा आनंद व्यक्त केला. सोशल मीडियाच्या माध्यमातून त्यांनी आपली प्रतिक्रिया दिली. "पंतप्रधान नरेंद्र मोदींना 'बिंतांग आदिपूर्णा' हा इंडोनेशियाचा सर्वोच्च सन्मान मिळणं, ही सर्व भारतीयांसाठी प्रचंड अभिमानाची गोष्ट आहे. भारत आणि इंडोनेशिया यांच्यातील धोरणात्मक भागीदारी मजबूत करण्यासाठी पंतप्रधानांनी घेतलेल्या कठोर परिश्रमांची ही सर्वात मोठी पोचपावती आहे," असं जयशंकर यांनी स्पष्ट केलं.

इंडोनेशियाच्या राष्ट्राध्यक्षांचा भारतावर विश्वास

या दौऱ्यात भारत आणि इंडोनेशिया यांच्यात संरक्षण, व्यापार, आरोग्य आणि तंत्रज्ञान अशा अनेक क्षेत्रांत मोठे करार झाले. इंडोनेशियाचे राष्ट्राध्यक्ष प्रबोवो सुबियांतो यांनी भारताचं तोंडभरून कौतुक केलं. "भारत हा इंडोनेशियाचा विश्वासू आणि महत्त्वाचा धोरणात्मक भागीदार आहे," अशा शब्दांत त्यांनी आपला दृढ विश्वास मांडला. दोन्ही देशांमधील वाढत्या सहकार्याचं त्यांनी मोठ्या उत्साहात स्वागत केलं.

हेही वाचा: 'भारतीय मुस्लिमांनी सांस्कृतिक आदर्शांसाठी इंडोनेशियाकडे पाहावे'; आर.एस.एस. नेते सुनील आंबेकर यांचे प्रतिपादन

दौऱ्यातील मोठी आणि ऐतिहासिक उपलब्धी

पंतप्रधान मोदींच्या या दौऱ्यात शिक्षण आणि संरक्षण क्षेत्रात आणखी एक मोठा निर्णय घेण्यात आला. प्रसिद्ध 'इंडियन इन्स्टिट्यूट ऑफ मॅनेजमेंट (IIM) बंगळुरू'चे एक नवीन आणि अद्ययावत कॅम्पस इंडोनेशियातील पूर्व जावा भागात सुरू होणार आहे. या महत्त्वपूर्ण निर्णयाचा तिथल्या तरुणांना मोठा फायदा होणार आहे. यासोबतच ब्रह्मोस क्षेपणास्त्र खरेदी आणि सागरी सुरक्षेबाबतही दोन्ही देशांमध्ये सकारात्मक चर्चा पार पडली.

पंतप्रधान मोदींचा हा इंडोनेशिया दौरा भारतासाठी सर्वच आघाड्यांवर अत्यंत यशस्वी, फलदायी आणि ऐतिहासिक ठरला आहे.