मध्यपूर्वेतील इराण आणि अमेरिका यांच्यातील संघर्षामुळे जागतिक ऊर्जा बाजारपेठेत मोठी अनिश्चितता निर्माण झाली असली, तरी भारताला इंधनाचा कोणताही तुटवडा भासणार नाही, अशी ग्वाही केंद्रीय वाणिज्य आणि उद्योग मंत्री पीयुष गोयल यांनी दिली आहे. बुधवारी (११ मार्च २०२६) माध्यमांशी संवाद साधताना त्यांनी देशातील इंधन साठ्याबाबत महत्त्वपूर्ण माहिती दिली.

होर्मुझची सामुद्रधुनी बंद झाल्यामुळे आणि जागतिक स्तरावर कच्च्या तेलाच्या पुरवठा साखळीवर परिणाम झाला असला, तरी भारताने आधीच केलेल्या नियोजनामुळे आपण सुरक्षित आहोत, असे त्यांनी स्पष्ट केले.

"स्थिती नियंत्रणात, घाबरून जाऊ नका"

पीयुष गोयल यांनी सांगितले की, "देशात इंधनाचा अजिबात तुटवडा नाही. पंतप्रधान नरेंद्र मोदी यांच्या नेतृत्वाखालील सरकार परिस्थितीवर २४ तास लक्ष ठेवून आहे. आम्ही केवळ एका क्षेत्रावर अवलंबून नसून ४० हून अधिक देशांतून तेलाची आयात करत आहोत. पर्यायी मार्गांचा वापर केल्यामुळे पुरवठा साखळी सुरू आहे."

जागतिक स्तरावर कच्च्या तेलाचे दर वाढत असले, तरी भारत सरकारने आपल्या धोरणात्मक साठ्याचा (Strategic Reserves) विचार केला आहे. त्यामुळे नागरिकांनी कोणत्याही अफवांवर विश्वास ठेवून इंधनाचा साठा करण्याची किंवा घाबरून जाण्याची गरज नाही, असे आवाहनही त्यांनी केले.

निर्यातीवरही परिणाम होऊ देणार नाही

केवळ इंधनच नाही, तर भारतीय निर्यातदारांनाही या युद्धाची झळ बसू नये म्हणून सरकार विमा आणि लॉजिस्टिकसाठी नवीन योजना आखत असल्याचे गोयल यांनी नमूद केले. "आम्ही निर्यातदारांशी सातत्याने संवाद साधत आहोत आणि त्यांच्या मालाची सुरक्षित वाहतूक करण्यासाठी आवश्यक ते सर्व पाऊल उचलले जात आहेत," असेही त्यांनी सांगितले.

यापूर्वी पेट्रोलियम मंत्री हरदीप सिंग पुरी यांनीही देशातील एलपीजी आणि सीएनजी पुरवठा सुरळीत राहील, असे आश्वासन दिले होते. आता पीयुष गोयल यांच्या या विधानामुळे उद्योग जगताला आणि सर्वसामान्यांना मोठा दिलासा मिळाला आहे. जागतिक संकट असले तरी भारताने आपल्या 'इंधन सुरक्षा' रणनीतीमुळे स्वतःचा बचाव केला असल्याचे यावरून स्पष्ट होत आहे.