पश्चिम बंगाल विधानसभा निवडणुकीत भाजपने पहिल्यांदाच ऐतिहासिक विजय मिळवला आहे. या दणदणीत विजयानंतर पंतप्रधान नरेंद्र मोदी यांनी सोमवारी नवी दिल्लीतील भाजप मुख्यालयातून कार्यकर्त्यांना संबोधित केले. "बंगाल आता खऱ्या अर्थाने भीतीच्या छायेतून मुक्त झाले आहे. ही वेळ सूड घेण्याची नसून राज्यात बदल घडवण्याची आहे," असा मोठा संदेश त्यांनी दिला. तसेच राजकीय हिंसेची संस्कृती सोडून राज्याच्या भविष्यावर लक्ष केंद्रित करण्याचे आवाहन त्यांनी सर्व पक्षांना केले.

पश्चिम बंगाल, आसाम आणि पुडुचेरीमधील विजयानंतर भाजप मुख्यालयात मोठा जल्लोष पाहायला मिळाला. यावेळी बोलताना पंतप्रधान मोदींनी विरोधकांवर जोरदार निशाणा साधला. अलीकडेच महिला आरक्षण विधेयकाला विरोध केल्याबद्दल काँग्रेस, टीएमसी आणि इतर पक्षांना जनतेने मोठी शिक्षा दिली आहे. उत्तर प्रदेशातील आगामी २०२७ च्या विधानसभा निवडणुकांचा संदर्भ देत, समाजवादी पक्षालाही लवकरच महिलांच्या रोषाला सामोरे जावे लागेल, असा इशारा त्यांनी दिला.

'बदला नव्हे, बदल!'

आपल्या ५० मिनिटांच्या भाषणात पंतप्रधानांनी पश्चिम बंगालच्या निवडणुकांचे विशेष कौतुक केले. यापूर्वी इथल्या निवडणुकांमध्ये हिंसाचार, भीती आणि निष्पाप लोकांचे बळी जात असत. पण यावेळी चित्र पूर्णपणे वेगळे होते. राज्यात अत्यंत शांततेत मतदान पार पडले. विशेष म्हणजे पहिल्यांदाच मतदानादरम्यान कोणालाही आपला जीव गमवावा लागला नाही.

"बंगाल आता बदलाच्या एका नव्या टप्प्यात प्रवेश करत आहे. मला बंगालमधील प्रत्येक राजकीय पक्षाला एक कळकळीची विनंती करायची आहे. गेल्या अनेक दशकांत राजकीय हिंसाचारामुळे असंख्य लोकांचे आयुष्य उद्ध्वस्त झाले आहे. इथली निवडणूक संस्कृती आजपासून बदलली पाहिजे," असा विश्वास त्यांनी व्यक्त केला. आज भाजप जिंकला आहे. त्यामुळे आता सूडाची नाही तर बदलाची चर्चा झाली पाहिजे. भीतीची नाही, तर भविष्याची चर्चा झाली पाहिजे. हिंसेचे हे दुष्टचक्र आता कायमचे थांबवा, असे आवाहन त्यांनी केले.

महिला आरक्षणावरून विरोधकांवर घणाघात

भारताच्या महान लोकशाहीवरील विश्वासाचा हा विजय असल्याचे मोदी म्हणाले. काम करणाऱ्या राजकारणावरील आणि स्थिरतेच्या संकल्पावरील हा जनतेचा विश्वास आहे. त्यांनी पश्चिम बंगाल, आसाम, पुडुचेरी, तमिळनाडू आणि केरळच्या जनतेला आदराने नमन केले. यावेळी भाजप अध्यक्ष नितीन नबीन, केंद्रीय मंत्री अमित शहा आणि राजनाथ सिंह उपस्थित होते.

गेल्या वर्षी बिहार निवडणुकीच्या निकालावेळी त्यांनी एक आठवण सांगितली होती. गंगा नदी बिहारमधून पुढे वाहत थेट गंगासागरला (पश्चिम बंगाल) मिळते. आज गंगोत्रीपासून (उत्तराखंड) ते गंगासागरपर्यंत सर्वत्र कमळ फुलले आहे. गंगा मातेच्या खोऱ्यातील उत्तराखंड, उत्तर प्रदेश, बिहार आणि आता पश्चिम बंगाल या सर्व राज्यांमध्ये भाजप आणि एनडीएचे सरकार आहे.

लोकशाहीत हार-जीत हा एक नैसर्गिक भाग आहे. पण या पाच राज्यांतील जनतेने भारत ही लोकशाहीची जननी का आहे, हे जगाला दाखवून दिले आहे. या निवडणुकीत महिलांचा सहभाग अत्यंत लक्षणीय राहिला. विकसित भारताच्या उभारणीसाठी महिला शक्ती वेगाने पुढे जात आहे. पण काही दिवसांपूर्वी काँग्रेस आणि त्यांच्या मित्रपक्षांनी संसदेत 'नारी शक्ती वंदन अधिनियम' मंजूर होण्यापासून रोखले. महिला आरक्षण विधेयकाला विरोध करणाऱ्या पक्षांना महिलांच्या रोषाला सामोरे जावे लागेल, असे मी आधीच सांगितले होते. आज माता-भगिनींनी काँग्रेस, टीएमसी आणि द्रमुकला मोठी शिक्षा दिली आहे.

समाजवादी पक्षाला दिला इशारा

केरळमध्ये डाव्यांच्या १० वर्षांच्या गैरकारभाराचा फायदा काँग्रेसला नक्कीच मिळाला आहे. पण केरळच्या माता-भगिनी पुढच्या निवडणुकीत काँग्रेसला नक्कीच धडा शिकवतील, असा विश्वास त्यांनी व्यक्त केला. संसदेत महिला आरक्षणात अडथळे आणणाऱ्या समाजवादी पक्षालाही उत्तर प्रदेशातील महिलांच्या विरोधाला सामोरे जावे लागेल. महिलाविरोधी समाजवादी पक्ष काहीही करो, ते आपले पाप कधीच धुऊ शकणार नाहीत.

आसाम आणि पुडुचेरीच्या जनतेचे आभार

आसामचा संदर्भ देत पंतप्रधानांनी गंगा नदीसोबतच ब्रह्मपुत्रा नदीनेही भाजपवर मोठा आशीर्वाद दिल्याचे सांगितले. माता कामाख्याचा आशीर्वाद पक्षाच्या पाठीशी उभा राहिला. आसामच्या जनतेने सलग तिसऱ्यांदा भाजप-एनडीएवर विश्वास ठेवला आहे. २०२१ मध्ये एनडीएने 'बेस्ट पुडुचेरी' (BEST Puducherry) चे स्वप्न मांडले होते. तिथल्या जनतेने यावर विश्वास ठेवत आघाडीला आशीर्वाद दिला. पुडुचेरीचे तरुण आणि मच्छिमारांच्या उज्ज्वल भविष्यासाठी आम्ही सतत काम करत राहू, अशी ग्वाही त्यांनी दिली.

श्यामाप्रसाद मुखर्जींच्या आत्म्याला शांती मिळेल

सध्या देशातील २० हून अधिक राज्यांमध्ये भाजप-एनडीएचे सरकार आहे. 'नागरिक हाच देव' हा आपला मंत्र आहे. आपण जनतेच्या सेवेसाठी समर्पित आहोत, म्हणूनच जनता भाजपवर अधिकाधिक विश्वास ठेवत आहे. जिथे भाजप तिथे सुशासन आणि विकास, हे जनतेला स्पष्ट दिसत आहे.

पश्चिम बंगालमधील भाजपच्या या ऐतिहासिक विजयामुळे जनसंघाचे संस्थापक श्यामाप्रसाद मुखर्जी यांच्या आत्म्याला आता खऱ्या अर्थाने शांती मिळेल. भाजपच्या प्रत्येक लहान-मोठ्या कार्यकर्त्याने पुन्हा एकदा चमत्कार करत कमळ फुलवले आहे. तुम्ही नवा इतिहास रचला आहे, अशा शब्दांत त्यांनी कार्यकर्त्यांचे कौतुक केले. या भाषणानंतर पंतप्रधानांनी भाजप मुख्यालयात नितीन नबीन, अमित शहा, राजनाथ सिंह आणि माजी पक्षाध्यक्ष जे. पी. नड्डा यांच्यासोबत एक महत्त्वाची बैठक घेतली.