नवी दिल्ली

नीट-यूजी (NEET-UG) २०२६ च्या फेरपरीक्षेबाबत दाखल करण्यात आलेल्या दोन वेगवेगळ्या याचिकांवर तातडीने सुनावणी घेण्यास सर्वोच्च न्यायालयाने शुक्रवारी नकार दिला. ही फेरपरीक्षा २१ जून रोजी नियोजित आहे.

सरन्यायाधीश सूर्यकांत आणि न्यायमूर्ती व्ही. मोहना यांच्या खंडपीठाने स्पष्ट केले की, या याचिकांवर आता न्यायमूर्ती पी. एस. नरसिंहा यांच्या नेतृत्वाखालील खंडपीठ जुलै महिन्यात सुनावणी करेल. सर्वोच्च न्यायालयाचे अंशतः कामकाज सुरू असताना, या याचिका संबंधित खंडपीठाकडे सोपवण्यात आल्या आहेत. "सर्व नीट प्रकरणांची सुनावणी न्यायमूर्ती नरसिंहा यांच्या खंडपीठासमोरच होईल," असे सरन्यायाधीशांनी स्पष्ट केले.

विद्यार्थ्यांच्या मागण्या आणि चिंता

नीट-यूजी २०२६ च्या फेरपरीक्षेसाठी देण्यात आलेली तारीख बदलण्याची मागणी काही विद्यार्थ्यांनी याचिकांमधून केली होती. मूळ परीक्षा रद्द झाल्यामुळे आणि त्यानंतर फेरपरीक्षेची घोषणा झाल्यामुळे आपल्याला तयारीसाठी पुरेसा वेळ मिळाला नाही, असे या विद्यार्थ्यांचे म्हणणे आहे. मानसिक तणाव, परीक्षेच्या तारखांमधील क्लॅश आणि परीक्षेच्या विश्वासार्हतेबाबतची शंका यांसारख्या मुद्द्यांचा उल्लेख याचिकेत करण्यात आला आहे.

परीक्षेची तारीख बदलण्यास आपला विरोध नसून, केवळ तयारीसाठी अपुरा वेळ देण्यात आल्यामुळे ही मागणी करत असल्याचे याचिकाकर्त्यांनी स्पष्ट केले होते. मे महिन्यापासून सुरू असलेल्या नीट-यूजी वादामध्ये केंद्र सरकारने आणि नॅशनल टेस्टिंग एजन्सीने (NTA) काही ठोस पावले उचलली आहेत. परीक्षेत कोणतीही त्रुटी राहू नये यासाठी पंतप्रधान नरेंद्र मोदी स्वतः लक्ष ठेवून असल्याचे सॉलिसिटर जनरल तुषार मेहता यांनी यापूर्वी न्यायालयात सांगितले होते. २१ जून रोजी होणाऱ्या फेरपरीक्षेसाठी काही नवीन सुरक्षा यंत्रणाही लागू करण्यात आल्या आहेत.