पंजाबमध्ये पुराने झालेल्या प्रचंड नुकसानीची पाहणी करण्यासाठी पंतप्रधान नरेंद्र मोदी ९ सप्टेंबर रोजी राज्याचा दौरा करण्याची शक्यता आहे. राज्याचे मुख्य सचिव अनुराग वर्मा यांनी ही माहिती दिली. या दौऱ्यामुळे पूरग्रस्त पंजाबला केंद्राकडून मोठी मदत मिळण्याच्या आशा पल्लवित झाल्या आहेत.
गेल्या महिनाभरापासून सुरू असलेल्या मुसळधार पावसामुळे आणि नद्यांना आलेल्या पुरामुळे पंजाबमध्ये मोठे संकट ओढवले आहे. राज्य सरकारने दिलेल्या अंदाजानुसार, या नैसर्गिक आपत्तीमुळे राज्याचे तब्बल १३,२८९ कोटी रुपयांचे नुकसान झाले आहे. याच पार्श्वभूमीवर, पंजाब सरकारने केंद्राकडे २००० कोटी रुपयांच्या तातडीच्या आर्थिक मदतीची मागणी केली आहे.
काय आहे पंजाबमधील परिस्थिती?
या पुरामुळे राज्यातील १९ जिल्हे प्रभावित झाले असून, आतापर्यंत २९ लोकांचा मृत्यू झाला आहे. २.५ लाखांहून अधिक लोकांना या पुराचा फटका बसला असून, हजारो लोकांना सुरक्षित ठिकाणी हलवण्यात आले आहे.
या नैसर्गिक आपत्तीचा सर्वात मोठा फटका शेतकऱ्यांना बसला आहे. राज्यातील १.७६ लाख हेक्टरपेक्षा जास्त क्षेत्रावरील पिकांचे पूर्णपणे नुकसान झाले आहे, ज्यामुळे शेतकरी मोठ्या आर्थिक संकटात सापडले आहेत.
पंतप्रधान मोदींच्या या संभाव्य दौऱ्यामुळे मदत आणि पुनर्वसन कार्याला गती मिळण्याची अपेक्षा आहे. ते राज्यातील पूरग्रस्त भागांची पाहणी करून, नुकसानीचा आढावा घेतील आणि त्यानंतर केंद्राकडून मदतीची घोषणा केली जाऊ शकते, असे मानले जात आहे.
