'बकरी ईदनिमित्त कायद्यानुसार करा कुर्बानी'

Story by आवाज़ मराठी | Published by Bhakti Chalak • 2 d ago

प्रातिनिधिक फोटो

यंदा देशभरात ईद-उल-अझहा ७ जूनला साजरा होणार आहे. बाजारपेठांमध्ये चैतन्याचे वातावरण आहे. मोठ्या संख्येने लोक कुर्बानीसाठी जनावरे खरेदी करण्यासाठी बाजारात येत आहेत. उत्तर प्रदेशात ईद-उल-अझहा शांततेत आणि सौहार्दाने साजरा व्हावा यासाठी मुस्लिम संघटना मोठ्या प्रमाणात तयारी करत आहेत.

मुझफ्फरनगरमध्ये जमीयत उलमा-ए-हिंदच्या नेतृत्वाखाली महत्त्वाची बैठक झाली. अंबा विहार येथील मदरसा चिरागियात ही बैठक पार पडली. जिल्ह्यातील उलेमा आणि मुस्लिम संघटनांचे पदाधिकारी यात सहभागी झाले. संघटनेची बळकटी, ईद-उल-अझहाच्या तयारी आणि सामाजिक सौहार्द राखण्यावर सखोल चर्चा झाली.

प्रतिबंधित जनावरांची कुर्बानी टाळा

मुझफ्फरनगरच्या जमीयत उलमा-ए-हिंदचे अध्यक्ष मौलाना मुकर्रम कासमी यांनी ईद-उल-अझहावर प्रतिबंधित जनावरांची कुर्बानी न करण्याचे आवाहन केले. धार्मिक मर्यादा पाळण्याचेही त्यांनी सांगितले. मौलाना मुकर्रम अली कासमी यांच्या अध्यक्षतेखाली ही बैठक झाली.

यावेळी मौलाना कासमी म्हणाले, "प्रतिबंधित जनावरांची कुर्बानी करू नये. कुर्बानी गुप्तपणे करावी. त्याचे फोटो सोशल मीडियावर टाकणे टाळावे." बैठकीत संघटनेची मजबुती आणि सामान्य लोकांच्या सहभागावर चर्चा झाली. जिल्ह्यातील प्रमुख उलेमा आणि कार्यकर्ते यावेळी उपस्थित होते.

ईद-उल-अझहासाठी हेल्पलाइन

लखनऊ येथील इस्लामिक सेंटर ऑफ इंडियाने ईद-उल-अझहासाठी हेल्पलाइन क्रमांक जारी केले आहेत. या क्रमांकांवर संपर्क करून इस्लाम आणि कुर्बानीसंबंधी शंकांचे निरसन करता येईल. ही हेल्पलाइन २९ मे ते १० जूनपर्यंत कार्यरत असेल. कुर्बानी, हज, ईद-उल-अझहा आणि इतर धार्मिक बाबींसाठी फोन, व्हॉट्सॲप किंवा ईमेलद्वारे संपर्क साधता येईल. हज यात्रेकरूंना विशेष हेल्पलाइन क्रमांक देण्यात आले आहेत.