राजस्थानमधील एका दर्गा समितीने 'अशी' जपली बांधिलकी

Story by आवाज़ मराठी | Published by Bhakti Chalak • 5 h ago

राजस्थानच्या शाहपुरा जिल्ह्यात हजरत सैय्यद शाह मोहम्मद हुसैन बाबांच्या उर्सनिमित्त २१ जोडप्यांचा निकाह

राजस्थानच्या शाहपुरा जिल्ह्यात १९ मे रोजी मुस्लिम समाजाकडून उर्स आणि निकाह सोहळ्याच्या कार्यक्रमाचे आयोजन करण्यात आले होते. या सोहळ्यात २१ जोडप्यांचा निकाह पार पडला. पिपली वाले बाबा दरगाह समितीने हा कार्यक्रम यशस्वी करण्यासाठी सर्व व्यवस्था केली होती.

हजरत सैय्यद शाह मोहम्मद हुसैन बाबांचा उर्स

हजरत सैय्यद शाह मोहम्मद हुसैन बाबांच्या उर्सनिमित्त २१ जोडप्यांचा निकाह उत्साहात पार पडला. या निकाहासाठी दुल्हा-दुल्हन किंवा त्यांच्या कुटुंबीयांकडून एक रुपयाही घेतला गेला नाही. याचा सर्व खर्च दरगाह समितीने उचलला. समितीचे सदस्य मौलाना सिराज अहमद यांनी सांगितले की, दरवर्षी १९ मे रोजी हजरत सैय्यद शाह मोहम्मद हुसैन यांचा उर्स साजरा होतो. या दिवशी फैजाने ओलिया हा एकदिवसीय जश्न आयोजित केला जातो.

विनामूल्य निकाहाचा अनोखा उपक्रम

या कार्यक्रमात मुंबईचे हजरत अल्लामा मौलाना शाकिर नूरी, जयपुरचे नातख्वा इमरान रझा बरकाती आणि अजमेरचे मौलाना मोइनुद्दीन रिझवी मुख्य पाहुणे म्हणून उपस्थित होते. समितीचे अध्यक्ष हाजी सद्दीक पठान यांनी सांगितले की, उर्साच्या निमित्ताने २१ मुस्लिम जोडप्यांचा विनामूल्य निकाह पार पडला. हा सोहळा खासकरून त्या कुटुंबांसाठी होता, ज्यांना महागाईमुळे आपल्या मुलांचे लग्न करणे अवघड झाले आहे.

अजमेर दरगाहवर चादर अर्पण

नव्या आयुष्याच्या सुरुवातीने दुल्हा-दुल्हन आणि त्यांच्या पालकांच्या चेहऱ्यांवर आनंद आणि समाधान दिसत होते. समितीचे सचिव आमीन मोहम्मद, खजिनदार हाजी रमझान रंगरेज, लाल मोहम्मद आणि इतर सर्व सदस्यांनी या सोहळ्यासाठी महत्त्वाची भूमिका बजावली. या कार्यक्रमात पाहुण्यांसह शाहपुरा आणि आजूबाजूच्या गावातील लोकांनीही हजेरी लावली. उर्स आणि निकाह सोहळ्याच्या निमित्ताने अजमेर शरीफच्या दरगाहवर समितीच्या वतीने चादर अर्पण करण्यात आली. तसेच, समितीच्या सदस्यांचा पगडी घालून सन्मान करण्यात आला.

दुआ आणि शुभेच्छा

या सोहळ्याच्या शेवटी अजमेर दरगाहचे खादिम हाजी दरवेश सैय्यद सलीम चिश्ती यांनी दुल्हा-दुल्हन तसेच देशाच्या सुरक्षिततेसाठी आणि समृद्धीसाठी दुआ केली.