पुण्यातील कोंढवा परिसरात नशामुक्त शहरासाठी मुस्लिम फाउंडेशन आणि पोलिसांतर्फे काढण्यात आलेली भव्य रॅली
फझल पठाण
दारू, चरस, गांजा या व्यसनांनी आजवर हजारो संसार उद्ध्वस्त केले आहेत. सांस्कृतिक शहर म्हणून ओळखल्या जाणाऱ्या पुण्याला सध्या व्यसनाने जकडले आहे. ही व्यसनाधीनता अशीच पसरू द्यायची की त्याविरुद्ध पेटून उठायचे? या प्रश्नाचे उत्तर कोंढव्याच्या रस्त्यांवर उतरलेल्या हजारोंच्या जनसागराने दिले. शहरातील नागरिक, महिला आणि शालेय विद्यार्थ्यांनी एकत्र येत व्यसनाविरोधात जोरदार रणशिंग फुकले.
पुणे शहरात दिवसेंदिवस फोफावत चाललेल्या व्यसनाधीनतेच्या विळख्यातून शहराला आणि विशेषतः नव्या पिढीला बाहेर काढण्यासाठी आज शुक्रवारी सकाळी मुस्लिमबहुल कोंढवा परिसरात ही भव्य जनजागृती रॅली काढण्यात आली. मुस्लिम फाउंडेशनचे संस्थापक आणि स्थानिक नगरसेवक हाजी गफूर पठाण यांनी या मोहिमेचे नेतृत्व केले.
लोकचळवळीचे अभूतपूर्व दृश्य
शालेय विद्यार्थी, महिला, तरुण, मुस्लिम समाजातील नागरिक आणि स्थानिक रहिवासी हजारोंच्या संख्येने या मोहिमेत सहभागी झाले होते. हातात राष्ट्रध्वज तिरंगा घेऊन निघालेल्या या रॅलीने संपूर्ण परिसराचे लक्ष वेधून घेतले. नशेच्या आहारी गेलेल्या तरुणांना पुन्हा मुख्य प्रवाहात आणण्यासाठी आणि त्यांच्यातील आत्मविश्वास वाढवण्यासाठी ही जनजागृती रॅली अत्यंत महत्त्वाची ठरली.
या संपूर्ण अभियानाचे नियोजन अत्यंत पद्धतशीरपणे करण्यात आले होते. पुणे महानगरपालिका, मुस्लिम फाउंडेशन आणि कोंढवा पोलीस ठाणे यांच्या संयुक्त विद्यमाने या महा-रॅलीचे आयोजन करण्यात आले होते. प्रशासकीय यंत्रणा आणि सामाजिक संस्था एकत्र आल्या की किती मोठे परिवर्तन घडू शकते, याचे हे उत्तम उदाहरण ठरले. इतक्या मोठ्या प्रमाणावर निघालेल्या या रॅलीचे दृश्य पाहून रस्त्यावरून जाणाऱ्या प्रत्येक नागरिकाने यात उत्स्फूर्तपणे सहभाग नोंदवला.
हाजी गफूर पठाण यांचे खंबीर नेतृत्व
मुस्लिम फाउंडेशनचे संस्थापक आणि स्थानिक नगरसेवक हाजी गफूर पठाण यांनी या मोहिमेचे नेतृत्व केले. व्यसनाच्या विळख्यातून आपल्या परिसराला आणि तरुणांना वाचवण्यासाठी त्यांनी सर्व स्तरातील लोकांना एकत्र आणण्यात मोलाची भूमिका बजावली. रॅलीदरम्यान त्यांनी पोलीस प्रशासन आणि स्थानिक नागरिकांच्या सहकार्याचा उल्लेख करत मोहिमेचा मूळ हेतू स्पष्ट केला.
या लोकचळवळीची पार्श्वभूमी सांगताना हाजी गफूर पठाण म्हणाले, "आमचे पोलीस आयुक्त, वरिष्ठ पोलीस निरीक्षक आणि डीसीपी मॅडम सर्वजण नशामुक्त शहरासाठी मनापासून प्रयत्न करत आहेत. शहरात कुठेही अनुचित प्रकार घडत नसला, तरी आम्ही कोंढव्यातून ही नशामुक्तीची सुरुवात केली आहे."
मोहिमेतील विविध घटकांच्या सहभागाबद्दल बोलताना ते पुढे म्हणाले, "या जनजागृतीसाठी मस्जिदींचे उलेमा, तरुण पिढी, शाळेचे विद्यार्थी आणि सर्व नागरिक या रॅलीत एकत्र आले आहेत. कोंढवा नशामुक्त करण्याच्या ठाम इराद्यानेच आम्ही ही हाक दिली आहे."
परिसरातील अभूतपूर्व प्रतिसादाबद्दल आनंद व्यक्त करत त्यांनी जनतेला आवाहन केले, "५ ते १० हजार विद्यार्थी या ठिकाणी जमा झाले असून पूर्ण कोंढवा आज जागा झाला आहे. आपल्याला संपूर्ण भागातून नशा हद्दपार करायचा आहे. व्यसनाचे हे साम्राज्य आपल्याला पूर्णपणे उद्ध्वस्त करायचे आहे."
शालेय विद्यार्थ्यांचा लक्षवेधी सहभाग
या रॅलीचे सर्वात मोठे वैशिष्ट्य म्हणजे लहान-लहान मुलांचा आणि शालेय विद्यार्थ्यांचा असलेला मोठा सहभाग. हातातील फलकांवर लिहीलेले संदेश आणि त्यांच्या मुखातून निघणाऱ्या घोषणांनी उपस्थितांची मने जिंकली. आपले भविष्य सुरक्षित राहावे आणि आपला परिसर सुंदर अन् व्यसनमुक्त व्हावा, यासाठी हे चिमुकले संदेश देत होते. महिलांनीही मोठ्या संख्येने बाहेर पडून या अभियानाला आपला पूर्ण पाठिंबा दर्शवला.
केवळ जनजागृती करून न थांबता, अवैध अमली पदार्थांची विक्री करणाऱ्यांवर कडक कारवाई करण्याचा इशाराही यावेळी पोलीस प्रशासनाकडून देण्यात आला. पोलीस आयुक्त, पोलीस उपआयुक्त (DCP) आणि वरिष्ठ पोलीस निरीक्षकांच्या (PI) थेट मार्गदर्शनाखाली हे अभियान राबवले जात असल्याने गुन्हेगारांचे आणि नशाविक्रेत्यांचे धाबे दणाणले आहेत.
नशामुक्त पुण्यासाठी क्रांतीची नांदी
कोंढव्यातून सुरू झालेली ही जनजागृतीची ठिणगी आता संपूर्ण पुणे शहरात पसरण्याची शक्यता आहे. व्यसनाधीनतेच्या गंभीर प्रश्नावर केवळ सरकारवर अवलंबून न राहता, समाजाने स्वतःहून पुढे येणे गरजेचे आहे. हजारो नागरिकांनी घेतलेली ही नशामुक्तीची शपथ येणाऱ्या काळात पुणे शहराला एका नव्या आणि सुरक्षित दिशेने घेऊन जाईल, असा विश्वास याप्रसंगी व्यक्त करण्यात आला.
.jpeg)
