बलुची फुटीरतावाद्यांनी केले पाकिस्तानी रेल्वेचे अपहरण

Story by Bhakti Chalak | Published by Bhakti Chalak • 9 d ago

पाकिस्तानच्या जाफर एक्सप्रेसवर बलुच लिबरेशन आर्मीचा हल्ला

पाकिस्तानच्या बलुचिस्तान प्रांतातील जाफर एक्सप्रेस या सुमारे ५०० प्रवासी असलेल्या ट्रेनवर मंगळवारी फुटीरतावादी अतिरेक्यांनी हल्ला केला. रेडिओ पाकिस्तानने दिलेल्या माहितीनुसार, आतापर्यंत २७ अतिरेकी ठार झाले असून १५५ प्रवाशांना सुखरूप बाहेर काढण्यात यश आले आहे.

रॉयटर्सच्या अहवालानुसार, बलुचिस्तान लिबरेशन आर्मी (BLA) ने या हल्ल्याची जबाबदारी स्वीकारली आहे. त्यांनी रेल्वेचा ताबा घेतल्याचा दावा केला आहे. तसेच ३० सुरक्षा जवानांना ठार केल्याचा आणि २१४ प्रवाशांना ओलीस ठेवल्याचा दावा केला आहे. यामध्ये सक्रिय सेवा देणारे सुरक्षा कर्मचारी देखील असल्याचे BLA ने म्हटले आहे. मात्र, हे दावे स्वतंत्रपणे पडताळले गेलेले नाहीत.

नेमके काय घडले?

बलुच अतिरेक्यांनी बोगदा क्रमांक ८ वरील रेल्वे ट्रॅक उडवून दिला. त्यामुळे एक्स्प्रेस रुळावरून घसरली. यानंतर दहशतवाद्यांनी जाफर एक्सप्रेसवर गोळीबार केला. यामुळे एक्स्प्रेसचा वेग कमी झाला. दरम्यान, या घटनेत मोटरमन गंभीर जखमी झाला आहे. गोळीबारानंतर बलुचिस्तानमधील अतिरेक्यांनी ट्रेनचा ताबा घेतला.

अतिरेक्यांनी एका निवेदनात म्हटले आहे की, महिला, मुले आणि बलुच प्रवाशांना सोडल्याचा दावा केला आहे. परंतु, लष्करी जवानांना अजूनही ओलीस ठेवण्यात आले आहे. पाकिस्तानी लष्करानेही मदत पथकासह एक मदत ट्रेन रवाना केली आहे.

सुरक्षा दलांच्या म्हणण्यांनुसार, बोगद्याजवळ स्फोटाचा आवाज ऐकू आला होता आणि डोंगराळ भागात दहशतवाद्यांशी त्यांची चकमक सुरू होती. बीएलए हा अनेक वांशिक गटांपैकी सर्वात मोठा आहे जो सरकारविरुद्ध, विशेषतः बलुचिस्तानमध्ये दशकांपासून लढत आहे. ते या प्रदेशातील समृद्ध वायू आणि खनिज संसाधनांचे शोषण करत आहेत. बलुचिस्तानमध्ये या प्रदेशातील सरकार, सैन्य आणि चिनी हितसंबंधांवर वारंवार हल्ले झाले आहेत.

रेल्वे अधिकाऱ्यांच्या म्हणण्यानुसार, प्रवासी ट्रेनच्या नऊ डब्यांमधील ४५० प्रवासी आणि कर्मचाऱ्यांशी कोणताही संपर्क झालेला नाही. पाकिस्तानपासून बलुचिस्तानच्या स्वातंत्र्यासाठी वकिली करणाऱ्या विविध बलुच प्रतिरोधक गटांनी पाकिस्तान आणि चीनविरुद्ध नवीन तीव्र आक्रमणाची घोषणा केली. त्यानंतर बलुच नॅशनल आर्मी नावाच्या एका एकत्रित संघटनेची घोषणा करण्यात आली. त्यानंतर काही दिवसांतच हा हल्ला झाला आहे.

दोन वर्षांपूर्वीही जाफर एक्सप्रेसमध्ये स्फोट

१६ फेब्रुवारी २०२३ ला जाफर एक्सप्रेसमध्ये स्फोट झाला, ज्यामध्ये २ जणांचा मृत्यू झाला. ट्रेन चिचावतनी रेल्वे स्थानक ओलांडत असताना हा स्फोट झाला. हा हल्ल्याची तहरीक-ए-तालिबान पाकिस्तानने (टीटीपी) केल्याची माहिती समोर अली होती.

त्याच वेळी, गेल्या वर्षी १४ नोव्हेंबर २०२४ ला क्वेटा रेल्वे स्टेशनवर झालेल्या स्फोटात २६ जणांचा मृत्यू झाला होता. ५० हून अधिक लोक जखमी झाले. तेव्हाही बलुच लिबरेशन आर्मीने (बीएलए) हा हल्ला केल्याची माहिती समोर अली होती.

काय बलुचिस्तान लिबरेशन आर्मी?

बलुचिस्तानमधील अनेक लोकांचा असा विश्वास आहे की भारत-पाकिस्तान फाळणीनंतर त्यांना एक स्वतंत्र देश म्हणून राहायचे होते. पण त्याच्या संमतीशिवाय त्याला पाकिस्तानात समाविष्ट करण्यात आले. हे घडले नाही आणि म्हणूनच बलुचिस्तानमध्ये सैन्य आणि लोकांमधील संघर्ष आजही सुरू आहे.

माहितीनुसार, बलुचिस्तानमध्ये स्वातंत्र्याची मागणी करणाऱ्या अनेक संघटना आहेत परंतु बलुचिस्तान लिबरेशन आर्मी (बीएलए) ही सर्वात शक्तिशाली संघटना आहे. ही संघटना ७० च्या दशकात अस्तित्वात आली पण २१ व्या शतकात तिचा प्रभाव वाढला आहे.

बीएलएला बलुचिस्तानला पाकिस्तानी सरकार आणि चीनपासून मुक्त करायचे आहे. त्यांना वाटते की बलुचिस्तानच्या संसाधनांवर त्यांचा अधिकार आहे. पाकिस्तान सरकारने २००७ मध्ये बलुचिस्तान लिबरेशन आर्मीला दहशतवादी संघटना म्हणून सूचीबद्ध केले.