अमेरिकेचे अध्यक्ष डोनाल्ड ट्रम्प यांनी मंगळवारी इराणसोबतचे युद्ध काही आठवड्यांत संपण्याचे संकेत दिले आहेत. जागतिक ऊर्जा बाजारपेठ विस्कळीत करणाऱ्या या संघर्षातून अमेरिका लवकरच बाहेर पडण्याची शक्यता त्यांनी व्यक्त केली. ओव्हल ऑफिसमध्ये पत्रकारांशी बोलताना ट्रम्प म्हणाले की, "आम्ही लवकरच माघार घेणार आहोत. ही माघार कदाचित दोन आठवड्यांत, किंवा तीन आठवड्यांत पूर्ण होईल." महिनाभर चाललेले हे युद्ध थांबवण्याच्या तयारीबाबतचे ट्रम्प यांचे हे आतापर्यंतचे सर्वात स्पष्ट विधान मानले जात आहे.
हा संघर्ष संपवण्यासाठी तेहरानसोबत कोणताही करार करणे आवश्यक नसल्याचेही ट्रम्प यांनी स्पष्ट केले. "इराणला करार करण्याची गरज नाही. नाही, त्यांनी माझ्याशी करार केलाच पाहिजे असे काही नाही," असे त्यांनी नमूद केले.
त्याऐवजी, इराणला अण्वस्त्रे विकसित करण्यापासून रोखणे हेच आमचे मुख्य उद्दिष्ट आहे, असे ट्रम्प म्हणाले. "हे उद्दिष्ट पूर्ण झाले की आम्ही तिथून बाहेर पडू," असेही त्यांनी पुढे सांगितले. जागतिक तेलाचा मुख्य मार्ग असलेल्या हॉर्मुझच्या सामुद्रधुनीच्या सुरक्षेबाबत बोलताना ट्रम्प म्हणाले की, अमेरिका आता याची जबाबदारी घेणार नाही. "हे आमचे काम नाही. जे देश या सामुद्रधुनीचा वापर करत आहेत, मग ते फ्रान्स असो किंवा इतर कोणी, त्यांनी ही जबाबदारी उचलावी. आम्ही हे करत राहण्याचे आता कोणतेही कारण उरलेले नाही," अशा शब्दांत त्यांनी अमेरिकन मोहिमेला पाठिंबा न देणाऱ्या मित्रराष्ट्रांवर टीका केली.
दुसरीकडे, इस्रायलचे पंतप्रधान बेंजामिन नेतन्याहू यांनी सांगितले की, अमेरिका आणि इस्रायलच्या संयुक्त हल्ल्यांमुळे इराण कमकुवत होत असून प्रादेशिक समीकरणे बदलत आहेत. देशाला संबोधित करताना नेतन्याहू म्हणाले की, ही मोहीम इराणी राजवटीला पद्धतशीरपणे चिरडत आहे आणि इस्रायल प्रदेशातील महत्त्वाच्या देशांशी नवीन युती करत आहे. इराणने आपल्या लष्करी महत्त्वाकांक्षेवर प्रचंड पैसा खर्च केला असून त्यातून त्यांना काहीच साध्य झाले नाही, अशी टीका त्यांनी केली. "आता हे ठामपणे सांगता येईल की, त्यांचा तो 'ट्रिलियन' (एक लाख कोटी) रुपयांचा खर्च पाण्यात गेला आहे," असे नेतन्याहू म्हणाले.
इराण आता पूर्वीपेक्षा कमकुवत झाला असून इस्रायल अधिक प्रबळ होऊन पुढे आला आहे, मात्र युद्ध अजून संपलेले नाही, असा इशाराही त्यांनी दिला. कोणत्याही अधिकृत कराराशिवाय अमेरिका हे युद्ध थांबवू शकते, अशा वाढत्या शक्यतांच्या पार्श्वभूमीवर इस्रायलने आपली भूमिका मांडली आहे.
.jpg "अनीसा सय्यद")
.jpg "अलिमा रहमान")
.jpeg)
