युक्रेनचे रशियावर ड्रोन हल्ले

Story by आवाज़ मराठी | Published by Bhakti Chalak • 2 d ago

प्रातिनिधिक फोटो

रशियाच्या संरक्षण मंत्रालयाने रविवारी १ जून २०२५ रोजी सांगितलं की, युक्रेनने पाच हवाई तळांवर ड्रोन हल्ले केले. यात काही विमानांचं नुकसान झालं. युक्रेनच्या सुरक्षा सेवेने (SBU) ११ महिन्यांच्या तयारीनंतर केलेल्या या हल्ल्यात ४० रशियन विमाने, त्यात TU-95 आणि Tu-22 ही अण्वस्त्रक्षम रणनीतिक बॉम्बर, नष्ट झाल्याचा दावा युक्रेनने केला (BBC न्यूज एक्स पोस्ट).

रशियन संरक्षण मंत्रालयाने सांगितलं, “किव्ह शासनाने मुरमन्स्क, इर्कुत्स्क, इव्हानोवो, रियाझान आणि अमूर प्रांतातील हवाई तळांवर FPV ड्रोनने दहशतवादी हल्ला केला. इव्हानोवो, रियाझान आणि अमूरमधील हल्ले परतवले गेले.” सैनिक किंवा नागरिकांमध्ये कोणतीही हानी झाली नाही. काही हल्लेखोरांना अटक केली, असं मंत्रालयाने म्हटलं.

मुरमन्स्कमधील ओलेनोगोर्स्क आणि इर्कुत्स्कमधील स्रेद्नी येथे प्रथमच जवळून ट्रेलर ट्रकमधून ड्रोन हल्ले झाल्याचं निश्चित झालं. “मुरमन्स्क आणि इर्कुत्स्कमधील तळांजवळून FPV ड्रोन सोडल्याने काही विमाने जळाली. आग विझवली,” असं मंत्रालयाने सांगितलं.

निरीक्षकांचं मत आहे की, युक्रेनचे राष्ट्राध्यक्ष वोलोदिमिर झेलेन्स्की सोमवारी इस्तांबुल येथे होणाऱ्या दुसऱ्या शांतता चर्चेपूर्वी मॉस्कोवर दबाव टाकू इच्छितात. रशियन शिष्टमंडळ, क्रेमलिनचे सहाय्यक व्लादिमिर मेदिन्स्की यांच्या नेतृत्वाखाली, सोमवारच्या चर्चेसाठी तुर्कस्तानात पोहोचलं आहे. तज्ज्ञांचं म्हणणं आहे की, युक्रेनमध्ये तात्काळ शस्त्रसंधीची आशा फारच कमी आहे.