केंद्रीय माध्यमिक शिक्षण मंडळाच्या (सीबीएसई) इयत्ता १२ वीच्या परीक्षा प्रक्रियेतील डिजिटल मूल्यमापन पद्धतीमध्ये (डिजिटल इव्हॅल्युएशन सिस्टम) कथित अनियमितता समोर आल्यानंतर केंद्र सरकारने मोठी कारवाई केली आहे. सीबीएसईचे अध्यक्ष राहुल सिंग आणि सचिव हिमांशू गुप्ता यांची मंगळवारी राष्ट्रीय शिक्षण मंडळातून तडकाफडकी बदली करण्यात आली आहे, अशी माहिती अधिकृत सूत्रांनी दिली आहे. १२ वीच्या परीक्षा पद्धतीतील तांत्रिक त्रुटी आणि विद्यार्थ्यांच्या गंभीर आक्षेपांनंतर बोर्डाचे हे दोन सर्वोच्च अधिकारी प्रशासकीय रडारवर आले होते.
सीबीएसई बोर्डाचा हा वाद तेव्हा सुरू झाला, जेव्हा १२ वीच्या काही विद्यार्थ्यांनी गंभीर आरोप केले की, बोर्डाकडून अपलोड करण्यात आलेल्या त्यांच्या उत्तरपत्रिकांच्या स्कॅन केलेल्या प्रतींमधील हस्ताक्षर त्यांच्या स्वतःच्या हस्ताक्षराशी जुळत नव्हते. यामुळे सीबीएसईच्या ऑन-स्क्रीन मार्किंग (ओएसएम) पद्धतीमध्ये उत्तरपत्रिकांची अदलाबदल किंवा मोठा गोंधळ झाल्याची भीती व्यक्त करण्यात आली. या धक्कादायक प्रकारामुळे विद्यार्थी आणि पालकांमध्ये तीव्र असंतोष निर्माण झाला होता.
ऑन-स्क्रीन मार्किंग पद्धतीवर प्रश्नचिन्ह
विद्यार्थी आणि पालकांनी सीबीएसई बोर्डाच्या परीक्षा प्रक्रियेत लागू करण्यात आलेल्या ऑन-स्क्रीन मार्किंग (ओएसएम) प्रणालीच्या अंमलबजावणीवर आणि सुरक्षेवर गंभीर प्रश्न उपस्थित केले होते. या पारदर्शकतेच्या अभावामुळे बोर्डाच्या विश्वासार्हतेला मोठा धक्का बसला. या डिजिटल मूल्यमापन पद्धतीमधील त्रुटींशिवाय तांत्रिक बिघाड, शुल्काचा भरणा अयशस्वी होणे आणि गुण पडताळणी तसेच पुनर्मूल्यांकन प्रक्रियेतील प्रचंड दिरंगाई यांमुळे सीबीएसई बोर्डावर चहूबाजूंनी कडक टीका होत होती.
या संपूर्ण प्रक्रियेत अधिक पारदर्शकता आणि जबाबदारी निश्चित करण्याची मागणी विद्यार्थी, पालक आणि शैक्षणिक संघटनांकडून सातत्याने केली जात होती. वाढता वाद आणि विद्यार्थ्यांचे हित लक्षात घेऊन अखेर सरकारने हे पाऊल उचलले आहे. एका वरिष्ठ अधिकाऱ्याने दिलेल्या माहितीनुसार, पारदर्शकता राखण्यासाठी आणि या प्रकरणाची सखोल चौकशी करण्यासाठी बोर्डाच्या अध्यक्ष आणि सचिवांची तातडीने अन्यत्र बदली करण्यात आली आहे.
.jpeg)
