मुंबई 

'ये रिश्ता क्या कहलाता है' फेम लोकप्रिय टेलिव्हिजन अभिनेता मोहसीन खान याने आपली खास मैत्रीण तमन्नासोबत साखरपुडा केल्याची गोड बातमी चाहत्यांसोबत शेअर केली आहे. रविवारी आपल्या अधिकृत इन्स्टाग्राम हँडलवर साखरपुड्यातील सुंदर छायाचित्रे शेअर करत अभिनेत्याने या नव्या प्रवासाची अधिकृत घोषणा केली आहे. या पोस्टनंतर मनोरंजन विश्वातून आणि चाहत्यांकडून या जोडप्यावर अभिनंदनाचा वर्षाव होत आहे.

तमन्नासोबतचे फोटो शेअर करताना मोहसीन खानने एक अत्यंत भावनिक आणि सुंदर कॅप्शन लिहिले आहे. "ही सुंदर, आत्मविश्वासी, संवेदनशील मुलगी — जी नेहमी हसत असते, चेष्टा करते, स्वप्न पाहते आणि प्रार्थना करते, माझ्यासाठी जणू स्वर्गातच ठरवली होती. ज्या पहिल्या क्षणी आम्ही एकमेकांकडे पाहिले, ज्या पहिल्यांदा मी तुझा हात धरला, तेव्हाच माझ्या मनातील भावना स्पष्ट झाल्या," अशा शब्दांत त्याने आपल्या भावना व्यक्त केल्या आहेत.

चाहत्यांकडून आणि कलाकारांकडून शुभेच्छांचा वर्षाव

मोहसीनच्या या पोस्टवर टीव्ही विश्वातील अनेक कलाकारांनी प्रतिक्रिया देत भावी आयुष्यासाठी शुभेच्छा दिल्या आहेत. अभिनेत्री ईशा सिंग हिने "खूप खूप प्रेम आणि अभिनंदन" असे लिहिले, तर निया शर्मा आणि कनिका मान यांनीही या जोडप्याचे अभिनंदन केले. 'ये रिश्ता क्या कहलाता है' या मालिकेत कार्तिक गोएंकाची भूमिका साकारून घराघरांत पोहोचलेल्या मोहसीन खानच्या या नव्या सुरुवातीमुळे त्याचे चाहते अत्यंत आनंदी आहेत.