नवी दिल्ली
आंतरराष्ट्रीय ॲक्शनपटांमध्ये आपल्या दिग्दर्शनासाठी ओळखले जाणारे मोरोक्कन-बेल्जिमियन दिग्दर्शक आदिल एल अर्बी आणि बिलाल फल्लाह यांनी त्यांच्या आगामी '७ डॉग्ज' (7 Dogs) या चित्रपटात बॉलिवूड सुपरस्टार सलमान खानसोबत काम करण्याचा अनुभव शेअर केला आहे. सलमान खानसोबत काम करणे म्हणजे एखाद्या फिल्म स्कुलमध्ये जाण्यासारखे होते, असे सांगत त्यांनी सलमानच्या चित्रपटातील सहज समज आणि उत्कृष्ट कौशल्याचे कौतुक केले आहे.
'बॅड बॉईज' या प्रसिद्ध फ्रँचायझीचे दिग्दर्शन करणाऱ्या या जोडीने सौदी अरेबियन चित्रपटासाठी जगातील दिग्गज कलाकारांना एकत्र आणले आहे. यात इजिप्तचे प्रसिद्ध अभिनेते अहमद इज आणि करीम अब्देल अजीज यांच्यासह सलमान खान आणि संजय दत्त यांच्याही महत्त्वाच्या भूमिका आहेत. याशिवाय हॉलीवूड अभिनेता जँकार्लो एस्पोसिटो आणि इटालियन अभिनेत्री मोनिका बेलुची हेदेखील या चित्रपटात झळकणार आहेत.
सलमान खानच्या सेटवरील वागणुकीबद्दल बोलताना आदिल एल अर्बी म्हणाले की, सलमानमध्ये विल स्मिथसारखाच विलक्षण करिष्मा आहे. जेव्हा तुम्ही कॅमेरा त्याच्यावर रोखता, तेव्हा काहीतरी जादुई घडते. सलमानकडे प्रचंड अनुभव असल्याने तो सेटवर आल्यावर लगेचच दृश्य समजून घेतो आणि त्यात स्वतःची खास शैली जोडतो. तो फक्त एक शॉट देत नाही, तर सिनेमा प्रत्यक्ष आपल्या डोळ्यांसमोर उलगडताना दिसतो, असेही ते म्हणाले.
चित्रपटातील आणखी एक भारतीय स्टार संजय दत्त यांच्यासोबतच्या अनुभवाबद्दल बोलताना बिलाल फल्लाह म्हणाले की, संजय दत्तसोबत त्यांचे कुटुंबासारखे नाते निर्माण झाले आहे. मुंबईत असताना संजय दत्तने त्यांना अनेक ऐतिहासिक आणि प्रामाणिक ठिकाणे दाखवली. त्यांची सर्जनशीलता आणि बॉलिवूडमधील ॲक्शन चित्रपटांची गुंतागुंत अत्यंत थक्क करणारी असल्याचे त्यांनी नमूद केले. हा बहुभाषिक चित्रपट हिंदी आणि इंग्रजी भाषेत २१ ऑगस्ट रोजी चित्रपटगृहात रिलीज होत आहे.
.jpeg)
