नवी दिल्ली
बॉलिवूडचा सुपरस्टार सलमान खानने कृत्रिम बुद्धिमत्तेचा (AI) होत असलेला गैरवापर आणि बनावट डीपफेक व्हिडिओंच्या वाढत्या प्रमाणावर तीव्र संताप व्यक्त केला आहे. 'बिग बॉस २०' च्या मंचावर बोलताना त्यांनी अशा प्रकारच्या गैरप्रकारांना आळा घालण्यासाठी कठोर कायदे करण्याची आणि संबंधितांना तुरुंगात पाठवण्याची मागणी केली आहे.
एआयच्या प्रगतीमुळे निर्माण झालेली परिस्थिती अत्यंत भयावह बनली असल्याचे सांगत सलमान खान म्हणाले की, "कोणीतरी एआय व्हिडिओ बनवत आहे किंवा व्हॉईस डबिंग करत आहे, जे पूर्णपणे चुकीचे आहे. आज अनेक लोकांचे एआय व्हिडिओ तयार केले जात आहेत, ज्यामध्ये माझाही समावेश आहे." सोशल मीडियावर कडक सेन्सॉरशिप लागू करण्याची गरज त्यांनी यावेळी बोलून दाखवली.
जोपर्यंत अशा कृत्यांमध्ये सहभागी असलेल्या लोकांना शिक्षा होत नाही, तोपर्यंत हा प्रकार थांबणार नाही, असे मत त्यांनी व्यक्त केले. "जोपर्यंत एखादा किंवा दोघे अशा प्रकरणात तुरुंगात जात नाहीत, तोपर्यंत हे थांबणार नाही. यासाठी एक कायदा पास केला पाहिजे आणि सोशल मीडियावर सेन्सॉरशिप असायला हवी," असे सलमान खान म्हणाले.
दरम्यान, सेलिब्रिटींचे एआय-जनरेटेड डीपफेक व्हिडिओ आणि छायाचित्रे ही सध्या एक गंभीर समस्या बनली आहे. यापूर्वी रश्मिका मंदान्ना, कतरिना कैफ, रणवीर सिंग आणि आलिया भट्ट यांसारखे अनेक नामवंत कलाकार या डीपफेक सामग्रीचे शिकार ठरले आहेत. रश्मिका मंदान्नाने २०२३ मध्ये याविरोधात आवाज उठवत डीपफेक सामग्रीला अत्यंत भयावह म्हटले होते, ज्याला अमिताभ बच्चन आणि नागा चैतन्य यांसारख्या कलाकारांनीही पाठिंबा दिला होता.
.jpeg)
