नवी दिल्ली
रणबीर कपूर आणि साई पल्लवी यांची मध्यवर्ती भूमिका असलेल्या 'रामायण: पार्ट वन' (Ramayana: Part One) या चित्रपटाने जागतिक बॉक्स ऑफिसवर कमाईचा नवा विक्रम रचला आहे. प्रदर्शित झाल्यापासून अवघ्या ५ दिवसांत या चित्रपटाने जगभरात ५५.७ दशलक्ष डॉलर्स म्हणजेच ५०० कोटी रुपयांपेक्षा अधिक कमाई केली आहे. जागतिक बॉक्स ऑफिसवर जपानच्या 'गॉडझिला मायनस झिरो' या चित्रपटानंतर (६३ दशलक्ष डॉलर्स) 'रामायण'ने दुसरे स्थान पटकावले आहे.
नितेश तिवारी दिग्दर्शित आणि नमित मल्होत्रा यांच्या प्राइम फोकस स्टुडिओने निर्मित केलेला हा चित्रपट ५ नोव्हेंबर रोजी प्रदर्शित झाला होता. 'रामायण: पार्ट वन'च्या एकूण कमाईपैकी मोठा हिस्सा भारतातून आला आहे. पहिल्या चार दिवसांत या चित्रपटाने भारतात २८५.२० कोटी रुपयांची gross कमाई केली आहे. ५ नोव्हेंबर रोजी ६४.८५ कोटी रुपयांच्या दणकेबाज ओपनिंगनंतर शनिवारी चित्रपटाने ६९.८० कोटी रुपयांचा विक्रमी गल्ला जमवला.
'डेडलाईन' या ट्रेड रिपोर्टनुसार, आंतरराष्ट्रीय वितरणाची जबाबदारी असलेल्या सोनी पिक्चर्सने दिलेल्या माहितीनुसार अमेरिकेत या चित्रपटाने १२.२ दशलक्ष डॉलर्स (सुमारे ११४ कोटी रुपये) आणि इतर ३७ देशांत ११.५ दशलक्ष डॉलर्स (सुमारे १०८ कोटी रुपये) कमावले आहेत. या दोन भागांच्या भव्य चित्रपट प्रकल्पाचे एकूण बजेट सुमारे ४,००० कोटी रुपये असल्याचे सांगितले जाते.
प्रभू श्रीरामांचा प्रवास, १४ वर्षांचा वनवास, रावणाकडून सीताहरण आणि त्यानंतर झालेला अधर्मावर धर्माचा विजय यावर आधारित या चित्रपटाचे संगीत ऑस्करविजेते संगीतकार हॅन्स झिमर आणि ए. आर. रहमान यांनी तयार केले आहे. हॅन्स झिमर यांचा हा पहिलाच भारतीय चित्रपट प्रकल्प आहे. तसेच टेरी नोटारी आणि गाय नॉरिस यांच्यासारख्या जागतिक दर्जाच्या तंत्रज्ञांनी यातील ॲक्शन दृश्यांची रचना केली आहे.
