डिजिटल विश्वात भारताने पुन्हा एकदा आपले वर्चस्व सिद्ध केले आहे. एका भारतीय यूट्यूब चॅनेलने जगातील बड्या दिग्गज कन्टेन्ट क्रिएटर्सना मागे टाकत पहिला क्रमांक पटकावला आहे. 'कॅपविंग' या संस्थेने प्रसिद्ध केलेल्या ताज्या अहवालानुसार, भारताचे 'बंदर अपना दोस्त' हे यूट्यूब चॅनेल २०२४ मध्ये जागतिक स्तरावर सर्वाधिक पाहिले गेलेले चॅनेल ठरले आहे. विशेष म्हणजे या चॅनेलने अमेरिकेचा जगप्रसिद्ध युट्यूबर 'मिस्टर बीस्ट' यालाही शर्यतीत मागे सोडले आहे.
या अहवालातील आकडेवारी थक्क करणारी आहे. 'बंदर अपना दोस्त' या चॅनेलने तब्बल २०.७ अब्ज व्ह्यूजचा टप्पा गाठला आहे. दुसरीकडे, जागतिक कीर्तीच्या 'मिस्टर बीस्ट'ला १६.९ अब्ज व्ह्यूज मिळाले आहेत. म्हणजेच एका भारतीय चॅनेलने जगातील सर्वात मोठ्या मानल्या जाणाऱ्या युट्यूबरला सुमारे ४ अब्ज व्ह्यूजच्या मोठ्या फरकाने पराभूत केले आहे.
हे चॅनेल नक्की कशाबद्दल आहे, याची उत्सुकता सर्वांनाच लागली आहे. नावावरून लक्षात येते त्याप्रमाणे या चॅनेलवरील व्हिडिओंचे मुख्य आकर्षण प्राणी आहेत. हे चॅनेल प्रामुख्याने 'यूट्यूब शॉर्ट्स' प्रकारातील व्हिडिओ बनवते. यामध्ये माकडे आणि इतर प्राणी माणसांप्रमाणे वागताना किंवा गमतीशीर कृती करताना दाखवले जातात. हलकेफुलके विनोद आणि प्राण्यांचे हावभाव यामुळे हे व्हिडिओ लहानांपासून मोठ्यांपर्यंत सर्वांच्या पसंतीस उतरले आहेत.
केवळ 'बंदर अपना दोस्त' नव्हे, तर भारताचे संगीत क्षेत्रातील अग्रगण्य चॅनेल 'टी-सीरीज' देखील या शर्यतीत आघाडीवर आहे. टी-सीरीज या यादीत चौथ्या क्रमांकावर असून त्यांना १४.४ अब्ज व्ह्यूज मिळाले आहेत. दरम्यान, लहान मुलांसाठी प्रसिद्ध असलेले 'किड्स डायना शो' हे चॅनेल १५.५ अब्ज व्ह्यूजसह तिसऱ्या स्थानावर राहिले आहे.
हा अहवाल सध्याच्या युगातील प्रेक्षकांची बदलती आवड स्पष्ट करतो. प्रेक्षक आता मोठ्या लांबीच्या व्हिडिओंपेक्षा छोटे आणि वेगवान व्हिडिओ पाहण्याला अधिक पसंती देत आहेत. यादीतील पहिल्या २५ चॅनेल्सपैकी १९ चॅनेल्स हे प्रामुख्याने 'शॉर्ट्स' किंवा लहान व्हिडिओ बनवणारे आहेत. कमी वेळात मनोरंजन होत असल्याने अशा चॅनेल्सची लोकप्रियता प्रचंड वाढली आहे. एका साध्या भारतीय कल्पनेने जागतिक इंटरनेट विश्वावर राज्य करणे ही देशासाठी नक्कीच अभिमानाची बाब आहे.
.jpeg)
