पाकिस्तानची लष्कर-ए-तैयबा ही दहशतवादी संघटना दिल्लीतील लाल किल्ला आणि चांदणी चौकातील एका मंदिरासह देशातील इतर प्रमुख धार्मिक स्थळांजवळ स्फोट घडवण्याचा कट रचत आहे. अशी माहिती सुरक्षा यंत्रणांच्या हवाल्याने सूत्रांनी दिली आहे.
ही दहशतवादी संघटना आयईडी (IED) द्वारे हल्ला करण्याची शक्यता सूत्रांनी वर्तवली आहे. पाकिस्तानची राजधानी इस्लामाबादमधील एका मशिदीत ६ फेब्रुवारी रोजी झालेल्या आत्मघातकी हल्ल्याचा बदला घेण्याचा या संघटनेचा प्रयत्न असल्याचे समजते. त्या मशिदीतील स्फोटात ३१ जणांचा मृत्यू झाला होता, तर १६० पेक्षा जास्त लोक जखमी झाले होते.
मशिदीवरील त्या हल्ल्याची जबाबदारी इस्लामिक स्टेट (IS) या गटाने स्वीकारली होती. "मंदिराच्या आतील दरवाजापाशी पोहोचल्यावर आत्मघातकी हल्लेखोराने शिया समुदायाच्या जमावात आपल्या स्फोटक जॅकेटचा स्फोट घडवून आणला, यामुळे मोठ्या संख्येने लोक मृत्युमुखी पडले आणि जखमी झाले," असे आयएसने आपल्या निवेदनात म्हटले होते.
दिल्लीतील ऐतिहासिक लाल किल्ल्याजवळ १० नोव्हेंबर २०२५ रोजी झालेल्या कार स्फोटानंतर तीन महिन्यांनी ही माहिती समोर आली आहे. त्या भीषण स्फोटात १२ जणांचा मृत्यू झाला होता आणि सुमारे दोन डझन लोक जखमी झाले होते. लाल किल्ला मेट्रो स्टेशनजवळ स्फोटकांनी भरलेल्या कारमुळे हा स्फोट झाला होता, त्यामुळे जवळच्या अनेक वाहनांना आग लागली होती. फरीदाबादमधील अल-फलाह विद्यापीठातील डॉक्टर उमर मोहम्मद उर्फ उमर उन नबी हा ती कार चालवत असल्याचे डीएनए चाचणीतून स्पष्ट झाले होते.
ही घटना घडली त्याच दिवशी राजधानीपासून अवघ्या ५० किमी अंतरावर हरियाणातील फरीदाबादमध्ये २,९०० किलो अमोनियम नायट्रेटसह इतर स्फोटके सापडली होती. तपासादरम्यान डॉ. मुझम्मिल शकील आणि डॉ. आदिल राठेर या दोन मुख्य सदस्यांना अटक करून स्फोटके जप्त करण्यात आली होती. यामुळे उमर मोहम्मद घाबरला आणि त्याने लाल किल्ल्याजवळ स्फोट घडवला, अशी माहिती सूत्रांनी दिली.
या प्रकरणी अमीर रशीद मीर, जासीर बिलाल वानी, मुफ्ती इरफान अहमद वागे, डॉ. मुझमिल शकील गनी, डॉ. अदील अहमद राठेर, डॉ. शाहीन सईद आणि सोयाब या सात जणांना अटक करण्यात आली आहे. त्यांची न्यायालयीन कोठडी नुकतीच १३ मार्चपर्यंत वाढवण्यात आली आहे. दिल्ली न्यायालयाने गेल्या आठवड्यात राष्ट्रीय तपास यंत्रणेला (NIA) या स्फोटाचा तपास पूर्ण करण्यासाठी ४५ दिवसांची मुदत दिली आहे.
.jpeg)
