बिम्स्टेक परिषदेत NSA अजित डोवाल यांचे आशियाई देशांना सहकार्याचे आवाहन
Story by Bhakti Chalak | Published by Bhakti Chalak • 12 h ago
बिम्स्टेक सुरक्षा परिषदेत आशियाई देशांच्या प्रतिनिधींसमवेत भारताचे राष्ट्रीय सुरक्षा सल्लागार अजित डोवाल
सध्या संपूर्ण जगात अनेक घडामोडी घडत आहेत. व्यापारावर याचा मोठा परिणाम झाला आहे. या विस्कळीत झालेल्या व्यवस्थेमुळे गरीब आणि विकसनशील देशांना मोठ्या आर्थिक संकटाचा सामना करावा लागत आहे. या समस्येतून बाहेर पडण्यासाठी बंगाल उपसागराच्या किनाऱ्यावर वसलेल्या सर्व देशांनी एकमेकांना साथ देणे आणि एकत्र येऊन काम करणे गरजेचे आहे, असे मत भारताचे राष्ट्रीय सुरक्षा सल्लागार अजित डोवाल यांनी व्यक्त केले आहे.
नवी दिल्लीत आयोजित करण्यात आलेल्या बिम्स्टेक सदस्य देशांच्या राष्ट्रीय सुरक्षा प्रमुखांच्या (National Security Chiefs) पाचव्या महत्त्वपूर्ण परिषदेत ते बोलत होते.
अजित डोवाल यांच्या अध्यक्षतेखाली नवी दिल्लीत झाली चर्चा
या महत्त्वाच्या बैठकीचे यजमानपद भारताचे राष्ट्रीय सुरक्षा सल्लागार अजित डोवाल यांनी सांभाळले. त्यांच्याच प्रमुख उपस्थितीत हा दौरा आणि बैठक पार पडली. या समूहातील सर्व सात देशांच्या सुरक्षा प्रमुखांना एकत्र आणून, आपापसातील सहकार्य वाढवणे आणि सर्वांसमोरील सामायिक आव्हानांवर एकत्र मिळून मार्ग काढणे हा या बैठकीचा मुख्य हेतू होता.
विस्कळीत व्यापार आणि आर्थिक फटका
बैठकीत बोलताना अजित डोवाल यांनी मालाच्या आयात-निर्यातेवर होणाऱ्या अडथळ्यांवर चिंता व्यक्त केली. ते म्हणाले, "जागतिक पातळीवर मालाची वाहतूक आणि पुरवठा करणारी साखळी विस्कळीत झाल्यामुळे आपल्या सर्वच देशांना मोठ्या आर्थिक अडचणी सोसाव्या लागल्या आहेत. अशा कठीण प्रसंगात आपल्या सर्व देशांनी एकत्र येऊन परस्परांच्या फायद्यासाठी ठोस पावले उचलली पाहिजेत. कोणत्याही समस्येवर केवळ आपापसातील संवादातून आणि चर्चेतूनच योग्य तोडगा निघू शकतो आणि आपण याच मार्गाने गेले पाहिजे."
या सर्व देशांची ताकद अधोरेखित करताना डोवाल यांनी सांगितले की, "हा समूह केवळ भौगोलिकदृष्ट्या एकत्र आलेला नाही, तर ही एक खूप मोठी आर्थिक शक्ती आहे. हिंदी महासागरातील अत्यंत महत्त्वाच्या आणि वेगवान हालचाली असणाऱ्या क्षेत्रांना जोडणारा हा एक मोठा मंच आहे. या सातही देशांची एकत्रित अर्थव्यवस्था सुमारे पाच लाख कोटी अमेरिकन डॉलर्सच्या घरात आहे. त्यामुळे या संपूर्ण क्षेत्राला आर्थिक स्थैर्य देण्याची मोठी क्षमता आपल्यामध्ये आहे."
नव्या संकटांशी लढण्यासाठी आपण सज्ज
या संपूर्ण परिसराच्या विकासासाठी सुरक्षेचे वातावरण असणे किती गरजेचे आहे, यावर त्यांनी भर दिला. दहशतवाद, आंतरराष्ट्रीय पातळीवरील संघटित गुन्हेगारी, इंटरनेटच्या माध्यमातून होणारे सायबर हल्ले आणि समुद्रातील सुरक्षा या आघाड्यांवर सर्व देशांनी आतापर्यंत एकत्र येऊन खूप चांगले काम केले आहे. याच अनुभवाच्या जोरावर भविष्यात येणाऱ्या कोणत्याही नव्या संकटाचा सामना करण्यासाठी आपले सर्व देश पूर्णपणे तयार आहेत, असा विश्वासही डोवाल यांनी शेवटी व्यक्त केला.
सुरक्षा सहकार्याचा आढावा
या परिषदेत बिम्स्टेकच्या सरचिटणीसांनी सुरक्षा क्षेत्रातील सहकार्याचा विस्तृत आढावा सादर केला. आपत्ती व्यवस्थापन, वाहतूक आणि व्यापार कनेक्टिव्हिटी, तंत्रज्ञान आणि लोकांचे परस्पर संबंध यांसारख्या विविध क्षेत्रांत झालेल्या प्रगतीवर चर्चा करण्यात आली. बिम्स्टेक देशांमधील माहितीची देवाणघेवाण यामुळे भविष्यातील आव्हानांचा सामना करणे अधिक सोपे होणार असल्याचे मत व्यक्त करण्यात आले.
सागरी सुरक्षा आणि धोरणात्मक निर्णय
दहशतवाद आणि संघटित गुन्हेगारीचा सामना करण्यासह सायबर, सागरी आणि ऊर्जा क्षेत्रातील सुरक्षा अधिक सक्षम करण्यावर या बैठकीत भर देण्यात आला. या परिषदेचे प्रमुख वैशिष्ट्य म्हणजे मानवतावादी मदत आणि आपत्ती निवारण मोहिमांसाठी सागरी घटकांच्या मार्गदर्शक तत्त्वांचा स्वीकार. यामुळे सदस्य देशांना आपत्कालीन परिस्थितीत वेगवान मदत कार्य करणे शक्य होईल. यासोबतच, समुद्रात सुरक्षा यंत्रणांच्या समन्वयासाठी गाइडिंग प्रिन्सिपल्सला मंजुरी देण्यात आली आहे.
बिम्स्टेकच्या स्थापनेला पुढील वर्षी तीस वर्षे पूर्ण होत आहेत. या पार्श्वभूमीवर, सर्व सदस्य देशांनी प्रादेशिक सुरक्षा अधिक बळकट करण्याचा आणि विविध सुरक्षा संकटांचा सामना करण्यासाठी आपापल्या संस्थात्मक क्षमता वाढवण्याचा निर्धार केला आहे.
'बिम्स्टेक' म्हणजे काय?
'बे ऑफ बेंगॉल इनिशिएटिव्ह फॉर मल्टि-सेक्टोरल टेक्निकल अँड इकॉनॉमिक कोऑपरेशन' (BIMSTEC) ही बंगालच्या उपसागराच्या किनाऱ्यावर आणि जवळ असणाऱ्या सात दक्षिण आशियाई आणि दक्षिण-पूर्व आशियाई देशांची आंतरराष्ट्रीय संघटना आहे. यामध्ये भारत, बांगलादेश, भूतान, नेपाळ, श्रीलंका, म्यानमार आणि थायलंड या देशांचा समावेश होतो. व्यापार, ऊर्जा, वाहतूक, पर्यटन आणि सुरक्षेच्या क्षेत्रात परस्परांना सहकार्य करणे हे या संघटनेचे मुख्य उद्दिष्ट आहे.
'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -
.jpg "११ वर्षीय भारतीय रेसिंग स्टार अतिका मीर")
.jpeg)
