नवी दिल्ली

संसदेचे आगामी पावसाळी अधिवेशन आणि भाजपमधील संभाव्य बदलांच्या पार्श्वभूमीवर, पंतप्रधान नरेंद्र मोदी यांच्या निवासस्थानी भाजपच्या वरिष्ठ नेतृत्वाची एक अत्यंत महत्त्वपूर्ण बैठक पार पडली. या बैठकीत केंद्रीय गृहमंत्री अमित शहा आणि भाजपचे अध्यक्ष नितीन नबीन यांच्यासह पक्षाचे राष्ट्रीय सरचिटणीस (संघटना) बी. एल. संतोष उपस्थित होते.

या उच्चस्तरीय बैठकीत नेमकी काय चर्चा झाली, याबद्दल कोणतीही अधिकृत माहिती देण्यात आलेली नाही. मात्र, संसदेचे अधिवेशन जवळ आले असल्याने आणि पक्षाच्या राष्ट्रीय कार्यकारिणी तसेच केंद्रीय मंत्रिमंडळात फेरबदलांची चर्चा रंगली असल्याने या बैठकीला विशेष महत्त्व प्राप्त झाले आहे.

संसदेचे पावसाळी अधिवेशन येत्या २० जुलैपासून सुरू होणार असून ते १३ ऑगस्टपर्यंत चालणार आहे. तत्पूर्वी, २१ जुलै रोजी एनडीए (NDA) घटक पक्षांची बैठक होण्याची शक्यता असून, त्यात संसदेतील रणनीतीवर चर्चा केली जाणार असल्याचे सूत्रांनी सांगितले.