एमआयएमचे (AIMIM) प्रमुख आणि हैदराबादचे खासदार असदुद्दीन ओवेसी यांनी दिल्ली स्फोटातील आरोपी डॉ. उमर उन नबी याच्या एका व्हिडिओवर सडकून टीका केली आहे. या तारीख नसलेल्या व्हिडिओमध्ये उमरने आत्मघातकी बॉम्बस्फोटांचे समर्थन केले होते. त्याने याला "शहादत" (हुतात्मा होणे) म्हटले होते आणि ही संकल्पनेकडे ‘गैरसमजातून’ (misunderstood) पाहिली जाते, असा दावा केला होता.

ओवेसी यांनी 'X' (पूर्वीचे ट्विटर) वर एक पोस्ट करून या दाव्याचा समाचार घेतला. त्यांनी स्पष्ट शब्दांत सांगितले की, "इस्लाममध्ये आत्महत्या 'हराम' (निषिद्ध) आहे आणि निष्पाप लोकांची हत्या करणे हे घोर पाप आहे."

"दिल्ली स्फोटातील आरोपी उमर नबीचा एक व्हिडिओ समोर आला आहे. त्यात तो आत्मघातकी बॉम्बस्फोटाला 'शहादत' म्हणत आहे आणि लोक त्याला 'चुकीचे समजतात' असा दावा करत आहे. पण सत्य हे आहे की, इस्लाममध्ये आत्महत्या हराम आहे. निष्पाप लोकांची हत्या हे महापाप आहे. अशी कृत्ये देशाच्या कायद्याच्याही विरोधात आहेत. यात कोणताही 'गैरसमज' नाही. हा निव्वळ दहशतवाद आहे आणि दुसरे काहीही नाही," असे ओवेसी यांनी ठणकावून सांगितले.

अमित शहांना विचारला जाब

याच वेळी, असदुद्दीन ओवेसी यांनी केंद्रीय गृहमंत्री अमित शहा यांनाही लक्ष्य केले. शहा यांनी यापूर्वी संसदेत दिलेल्या आश्वासनाची त्यांनी आठवण करून दिली.

ओवेसींनी विचारले, "'ऑपरेशन सिंदूर' दरम्यान आणि त्यानंतर अमित शहा यांनी संसदेला आश्वासन दिले होते की, गेल्या सहा महिन्यांत एकही स्थानिक काश्मिरी दहशतवादी गटात सामील झालेला नाही. मग हा गट आला कुठून? या गटाचा शोध घेण्यात आलेल्या अपयशाला जबाबदार कोण आहे?"

१५ लोकांचा बळी आणि तपास

उमरच्या व्हायरल व्हिडिओमध्ये तो आत्मघातकी बॉम्बस्फोटाचे समर्थन करताना दिसत होता. १० नोव्हेंबर रोजी सायंकाळी ७ वाजता दिल्लीतील ऐतिहासिक लाल किल्ल्याजवळ एका चालत्या ह्युंदाई i20 कारमध्ये हा स्फोट झाला. या आत्मघातकी हल्ल्यात १५ जणांचा मृत्यू झाला आणि दोन डझनहून अधिक लोक जखमी झाले.

दुसरीकडे, या प्रकरणाचा तपास वेगाने सुरू आहे. राष्ट्रीय राजधानीतील पटियाला हाऊस कोर्टातील विशेष एनआयए न्यायालयाने मंगळवारी जासिर बिलाल वानी उर्फ ​​दानिश याला १० दिवसांची एनआयए कोठडी सुनावली.

एनआयएने एका प्रसिद्धीपत्रकात सांगितले की, तपासादरम्यान जासिरची भूमिका स्पष्ट झाली आहे. त्याने दहशतवादी हल्ल्यांसाठी तांत्रिक मदत पुरवली होती. प्राणघातक कार बॉम्बस्फोटापूर्वी त्याने ड्रोनमध्ये बदल केले होते आणि रॉकेट बनवण्याचा प्रयत्न केला होता, असा आरोप आहे.

हा आरोपी जम्मू-काश्मीरमधील अनंतनाग जिल्ह्यातील काझीगुंडचा रहिवासी आहे. तो या हल्ल्यामागील एक सक्रिय सह-षडयंत्रकर्ता होता. त्याने दहशतवादी उमर उन नबी याच्यासोबत मिळून या संहाराचा कट रचला होता, असे एनआयएने म्हटले आहे.