मुंबईतील भांडुप पश्चिम रेल्वे स्थानक परिसरात सोमवारी रात्री उशिरा एक काळजाचा थरकाप उडवणारी घटना घडली. येथे एका 'बेस्ट' बसने पादचाऱ्यांना जोरदार धडक दिली. बस मागे घेत असताना हा अपघात झाला असून, यामध्ये ४ जणांचा जागीच मृत्यू झाला आहे, तर ९ जण गंभीर जखमी झाले आहेत. या घटनेमुळे संपूर्ण परिसरात हळहळ व्यक्त केली जात आहे.
मिळालेल्या माहितीनुसार, सोमवारी रात्री १० च्या सुमारास भांडुप स्थानकाबाहेरील अत्यंत गजबजलेल्या रस्त्यावर ही दुर्घटना घडली. बेस्टची ही बस चालकाने मागे घेण्याचा प्रयत्न केला. त्याच वेळी बसवरील नियंत्रण सुटले आणि बसने रस्त्यावरून जाणाऱ्या पादचाऱ्यांना चिरडले. या भीषण अपघातात तीन महिला आणि एका पुरुषाचा समावेश असलेल्या चार जणांना आपला जीव गमवावा लागला आहे.
अपघातानंतर तातडीने अग्निशमन दल, पोलीस आणि स्थानिक नागरिकांनी मदतकार्य सुरू केले. जखमींना जवळच्या राजावाडी आणि एम. टी. अग्रवाल रुग्णालयात उपचारासाठी दाखल करण्यात आले आहे. जखमींपैकी काही जणांची प्रकृती चिंताजनक असल्याचे समजते.
पोलिसांनी दिलेल्या माहितीनुसार, या प्रकरणी बस चालक संतोष रमेश सावंत (वय ५२) याला ताब्यात घेण्यात आले आहे. तो बेस्टचा कंत्राटी कर्मचारी असून घटनेच्या वेळी बसचा वाहक भगवान भाऊ घरत (वय ४७) हे देखील कर्तव्यावर होते. हा अपघात नेमका तांत्रिक बिघाडामुळे झाला की चालकाच्या निष्काळजीपणामुळे, याचा तपास पोलीस करत आहेत.
या दुर्घटनेची गंभीर दखल घेत राज्याचे उपमुख्यमंत्री आणि जिल्ह्याचे पालकमंत्री देवेंद्र फडणवीस यांनी मृतांच्या कुटुंबियांना प्रत्येकी ५ लाख रुपयांची आर्थिक मदत जाहीर केली आहे. त्यांनी सोशल मीडियाद्वारे या घटनेबद्दल तीव्र दुःख व्यक्त केले असून जखमींच्या लवकरात लवकर बरे होण्यासाठी प्रार्थना केली आहे.
स्थानिकांच्या म्हणण्यानुसार, भांडुप स्थानक परिसरात फेरीवाल्यांच्या अतिक्रमणामुळे पादचाऱ्यांना चालण्यासाठी जागाच उरत नाही, त्यामुळे लोकांना जीव मुठीत धरून रस्त्यावरून चालावे लागते. या समस्येमुळेच अशा दुर्घटना घडत असल्याचा आरोप प्रत्यक्षदर्शींनी केला आहे. बेस्ट प्रशासन आणि पोलिसांनी या प्रकरणाची सखोल चौकशी सुरू केली आहे.
