नवी दिल्ली

संरक्षण संशोधन आणि विकास संस्थेमध्ये (DRDO) कथित सायबर सुरक्षेचे उल्लंघन झाल्याबाबत माध्यमांमध्ये आलेले वृत्त चुकीचे आणि अप्रमाणित असल्याचे अधिकाऱ्यांनी मंगळवारी स्पष्ट केले आहे. सध्या कोणत्याही सक्रिय सायबर हल्ल्याचा किंवा अनधिकृत नेटवर्क घुसखोरीचा कोणताही पुरावा नाही, असे सांगण्यात आले आहे.

काही वृत्तवाहिन्यांनी डीआरडीओमध्ये डेटा ब्रिच झाल्याचे वृत्त दिले होते, ज्यामध्ये एक धोकादायक घटक डार्क वेबवर मोठा डेटा विकण्याचा प्रयत्न करत असल्याचा दावा करण्यात आला होता. या प्रकरणाची संरक्षण मंत्रालयाच्या स्तरावर कसून चौकशी करण्यात आली आहे. लीक झालेला दावा करण्यात आलेला बहुतांश डेटा हा गोपनीय नसून अनावृत (unclassified) स्वरूपाचा आहे.

जुना आणि बनावट डेटा समोर आणल्याचा दावा

तपासणीत असे समोर आले आहे की, 'महत्त्वाचा' म्हणून दाखवला जाणारा काही डेटा हा २०२०-२०२२ या काळातील जुन्या डेटा उल्लंघनाशी संबंधित आहे. हॅकर्सनी कागदपत्रे अद्यतनित आणि गोपनीय भासवण्यासाठी हेतुस्सर ती बनावट तयार केली आहेत, असे अधिकाऱ्यांनी सांगितले. या कथित डेटा लीक मधील सर्व कागदपत्रे जुनी असून त्यात अनेकदा बदल झाले आहेत, त्यामुळे त्यांचा सध्याच्या संरचनेत कोणताही संबंध नाही. आर्थिक फायद्यासाठी आणि घबराट पसरवण्यासाठी हा डेटा बनावट पद्धतीने तयार करण्यात आल्याचे अधिकाऱ्यांनी स्पष्ट केले.