नवी दिल्ली 

ब्रिक्स (BRICS) देशांमधील परस्पर व्यापारात स्थानिक चलनांचा वापर वेगाने वाढवण्याची जोरदार मागणी इराणचे राष्ट्रपती मसूद पेझेश्कियान यांनी शुक्रवारी केली. नवी दिल्लीत सुरू असलेल्या ब्रिक्स बिझनेस फोरममध्ये बोलताना त्यांनी इराणची भौगोलिक स्थिती, ऊर्जा संसाधने आणि वाहतूक मार्ग हे या गटाच्या आर्थिक कनेक्टिव्हिटीसाठी एक धोरणात्मक पूल म्हणून काम करू शकतात, असे प्रतिपादन केले.

मसूद पेझेश्कियान यांनी स्पष्ट केले की, ब्रिक्सने केवळ आपल्या आर्थिक क्षमतेवर अवलंबून न राहता व्यापार, गुंतवणूक आणि संयुक्त वित्तपुरवठ्याचे अधिक एकात्मिक जाळे तयार केले पाहिजे. चलन जोखिम व्यवस्थापन आणि परस्पर सेटलमेंट यंत्रणांच्या आधारे स्थानिक चलनांचा वापर वाढल्यास ब्रिक्समधील व्यापार राजकीय धक्क्यांपासून अधिक सुरक्षित होईल. तसेच न्यू डेव्हलपमेंट बँकेने पायाभूत सुविधा आणि ऊर्जा प्रकल्पांसाठी प्रमुख वित्तपुरवठा करणारी यंत्रणा म्हणून काम करावे, अशी मागणी त्यांनी केली.

१० अब्ज डॉलर्सच्या पुनर्वीमा कंपनीचा प्रस्ताव

इराणच्या राष्ट्रपतींनी ब्रिक्स देशांमध्ये ऊर्जा, अन्न आणि वाहतूक पुरवठा साखळी मजबूत करण्यासाठी डिजिटल कस्टम प्रक्रिया आणि नियमनातील अडथळे दूर करण्याचे आवाहन केले. तसेच, प्रमुख पायाभूत सुविधा प्रकल्पांना कव्हर करण्यासाठी १० अब्ज डॉलर्सच्या प्रारंभिक भांडवलासह 'ब्रिक्स संयुक्त पुनर्वीमा कंपनी' (BRICS Joint Reinsurance Company) स्थापन करण्याचा प्रस्ताव त्यांनी मांडला. सध्याची वित्तीय व्यवस्था मोजक्याच चलनांवर केंद्रित असल्यामुळे राजकीय दबावांना बळी पडत असल्याचे त्यांनी नमूद केले. शनिवारपासून सुरू होणाऱ्या दोन दिवसीय ब्रिक्स शिखर परिषदेत सहभागी होण्यासाठी ते नवी दिल्लीत आले आहेत.