नवी दिल्ली/जम्मू

जम्मूमध्ये माणुसकी आणि बंधुभावाचे एक हृदयस्पर्शी उदाहरण समोर आले आहे. जम्मू विकास प्राधिकरणाने (JDA) एका पत्रकाराचे घर जमीनदोस्त केल्यानंतर, एका स्थानिक हिंदू रहिवाशाने, कुलदीप शर्मा यांनी, त्यांना स्वतःच्या जमिनीचा तुकडा भेट देऊन माणुसकी जिवंत असल्याचे सिद्ध केले आहे.

पत्रकार अरफाझ अहमद डेंग हे 'न्यूज सेहर इंडिया'  या डिजिटल न्यूज चॅनेलचे संपादक आहेत. गुरुवारी जम्मूतील नरवाल भागात प्रशासनाने बुलडोझर चालवून त्यांचे घर पाडले. या कारवाईमुळे अरफाझ यांचे कुटुंब आणि लहान मुले उघड्यावर आली. या घटनेने संपूर्ण जम्मूमध्ये संतापाची लाट उसळली आहे.

अरफाझ यांनी सांगितले की, "तीन मार्ला (सुमारे ८१६ चौरस फूट) जागेवर बांधलेले माझे घर या भागातील एकमेव अनधिकृत बांधकाम नव्हते. तरीही, केवळ माझ्याच घराला लक्ष्य करण्यात आले. आम्हाला कोणतीही पूर्वसूचना दिली नाही किंवा साधी नोटीस ही बजावली नाही."

"माझा भाऊ रस्त्यावर राहणार नाही"

या कारवाईनंतर कुलदीप शर्मा, जे स्थानिक डोगरा समाजाचे आहेत, यांचा एक व्हिडिओ सोशल मीडियावर व्हायरल झाला आहे. या व्हिडिओमध्ये कुलदीप शर्मा अत्यंत भावूक झालेले दिसतात. त्यांनी या कारवाईला बदल्याची भावना  म्हटले आहे.

अरफाझ यांना मिठी मारताना कुलदीप शर्मांचे डोळे पाणावले होते. ते म्हणाले, "मी माझ्या भावाला असा रस्त्यावर राहू देणार नाही. प्रशासनाने ज्या निष्पाप मुलांना बेघर केले आहे, त्यांची अवस्था पाहून माझे काळीज तुटत आहे."

माध्यमांच्या साक्षीने त्यांनी आपल्या मुलीच्या हस्ते ५ मार्ला (सुमारे १३६१ चौरस फूट) जमिनीची कागदपत्रे अरफाझ यांना सोपवली. "ही जमीन मी कायदेशीररित्या माझ्या भावाच्या नावे करत आहे," असे त्यांनी जाहीर केले.

हा क्षण उपस्थितांच्या डोळ्यांत पाणी आणणारा होता. शर्मा कुटुंबीय आणि तिथे जमलेले लोक हे दृश्य पाहून गहिवरून गेले. जम्मू-काश्मीरच्या 'काश्मीरियत' आणि शतकानुशतके जुन्या बंधुभावाचे हे उत्तम उदाहरण असल्याचे प्रत्यक्षदर्शींनी सांगितले. इथे माणुसकी ही कोणत्याही धर्मापेक्षा किंवा ओळखीपेक्षा मोठी ठरली.

अंधारातील प्रकाशाचा किरण

घर पडल्याने कोलमडून गेलेले अरफाझ कागदपत्रे स्वीकारताना भारावून गेले होते. त्यांनी सांगितले की, "या अंधारमय आठवड्यात कुलदीप शर्मांची मदत माझ्यासाठी प्रकाशाचा किरण बनून आली आहे."

सोशल मीडियावर कौतुकाचा वर्षाव

जम्मू-काश्मीरमधील नागरिक, मग ते कोणत्याही धर्माचे असोत, त्यांनी शर्मा यांच्या या कृतीचे भरभरून स्वागत केले आहे. सोशल मीडियावर एका युजरने लिहिले, "आजकाल जेव्हा समाजात फूट पाडणाऱ्या गोष्टीच जास्त चर्चिल्या जातात, तेव्हा शर्मा यांच्या कृतीने माणुसकीवरचा विश्वास पुन्हा दृढ केला आहे."

प्रशासनावर संताप

व्हिडिओमध्ये कुलदीप शर्मा प्रशासनाच्या कारवाईवर तीव्र संताप व्यक्त करताना दिसतात. कडाक्याच्या थंडीत लहान मुलांना बेघर करणाऱ्या भाजप आणि ओमर अब्दुल्ला सरकारवर त्यांनी ताशेरे ओढले. "राजकारणी हिंदू आणि मुस्लिमांना एकमेकांच्या विरोधात उभे करून जम्मूची एकता तोडण्याचा प्रयत्न करत आहेत," असा आरोप त्यांनी केला.

अरफाझ डेंग हे अंमली पदार्थ आणि वाळू माफियांच्या विरोधात आवाज उठवण्यासाठी ओळखले जातात. कारवाईच्या वेळी त्यांनी सांगितले होते की, संपूर्ण वसाहतच अनधिकृत असताना केवळ त्यांच्याच वडिलांच्या घराला लक्ष्य करण्यात आले. त्यांचे कुटुंब तिथे चार दशकांपासून राहत होते. सीपीएम नेते एम.वाय. तारीगामी आणि पीडीपीचे वाहिद पारा यांनीही या कारवाईचा निषेध केला आहे.