जागतिक व्यापारात अनेक अडचणी असतानाही भारताने चीनला केल्या जाणाऱ्या निर्यातीत मोठी कामगिरी नोंदवली आहे. डिसेंबर २०२५ मध्ये भारताची चीनला होणारी निर्यात ६७.३५ टक्क्यांनी वाढली असून ती २.०४ अब्ज डॉलरवर (सुमारे १७ हजार कोटी रुपये) पोहोचली आहे. वाणिज्य आणि उद्योग मंत्रालयाने गुरुवारी ही अधिकृत आकडेवारी जाहीर केली. इलेक्ट्रॉनिक्स आणि सागरी उत्पादनांच्या मागणीत झालेली वाढ हे यामागील मुख्य कारण आहे.
वाणिज्य मंत्रालयाच्या आकडेवारीनुसार, केवळ निर्यातच नाही तर चीनकडून होणारी आयातही वाढली आहे. डिसेंबरमध्ये चीनकडून होणारी आयात २० टक्क्यांनी वाढून ११.७ अब्ज डॉलर झाली. या वाढीमुळे दोन्ही देशांमधील व्यापाराची गती स्पष्ट होते.
चीनला होणाऱ्या निर्यातीत वाढ होण्यामागे काही विशिष्ट क्षेत्रांचा मोठा वाटा आहे. यामध्ये ऑईल मील्स (पेंड), सागरी उत्पादने, टेलिकॉम उपकरणे आणि मसाल्यांचे पदार्थ यांचा समावेश आहे. विशेषतः इलेक्ट्रॉनिक्स क्षेत्रात 'प्रिंटेड सर्किट बोर्ड' (PCB), 'फ्लॅट पॅनल डिस्प्ले' आणि टेलिफोनी उपकरणांच्या निर्यातीत मोठी वाढ दिसून आली. तसेच कृषी आणि सागरी उत्पादनांमध्ये सुकलेल्या मिरच्या, कोळंबी आणि पेंडीचा समावेश आहे. याशिवाय ॲल्युमिनियम आणि शुद्ध तांब्याच्या निर्यातीनेही या वाढीत हातभार लावला आहे.
चालू आर्थिक वर्षातील एप्रिल ते डिसेंबर या नऊ महिन्यांचा विचार करता, भारताची चीनला होणारी एकूण निर्यात ३६.७ टक्क्यांनी वाढून १४.२४ अब्ज डॉलर झाली आहे. याच काळात चीनकडून होणारी आयात १३.४६ टक्क्यांनी वाढून ९५.९५ अब्ज डॉलरवर पोहोचली. त्यामुळे या नऊ महिन्यांत चीनसोबतची व्यापारी तूट ८१.७१ अब्ज डॉलर इतकी राहिली आहे.
वाणिज्य सचिव राजेश अग्रवाल यांनी या कामगिरीवर समाधान व्यक्त केले. "ही वाढ नक्कीच स्वागतार्ह आणि उत्साहवर्धक आहे," असे त्यांनी पत्रकारांशी बोलताना सांगितले. अमेरिका आणि युरोपमध्ये मागणी कमी असतानाही चीनच्या बाजारपेठेत भारतीय वस्तूंना मिळणारा हा प्रतिसाद महत्त्वाचा मानला जात आहे. सध्या अमेरिका हा भारताचा सर्वात मोठा व्यापारी भागीदार असून त्यानंतर चीनचा क्रमांक लागतो.
.jpg "आंदोलकांच्या मृतदेहांचा खच")
.jpg "प्रातिनिधिक चित्र")