ओमानच्या किनाऱ्याजवळ भारतीय क्रू मेंबर्स असलेल्या व्यावसायिक जहाजांवर अमेरिकन लष्कराने केलेल्या प्राणघातक हल्ल्यांबद्दल भारताने तीव्र आक्षेप घेतला आहे. भारताने शुक्रवारी अमेरिकेचे प्रभारी राजदूत जेसन मीक्स यांना समन्स बजावून अमेरिकन लष्कराची ही कारवाई पूर्णपणे 'अमान्य' असल्याचे सांगितले. या अमेरिकन कारवाईत तीन भारतीय खलाशांचा मृत्यू झाल्याची माहिती सरकारने दिल्यानंतर हे पाऊल उचलण्यात आले आहे.
परराष्ट्र मंत्रालयाने (MEA) दिलेल्या माहितीनुसार, ओमानच्या आखातात भारतीय खलाशांना घेऊन जाणाऱ्या व्यावसायिक जहाजांवर अमेरिकन नौदलाच्या दलांकडून सुरू असलेल्या हल्ल्यांबद्दल तीव्र निषेध नोंदवण्यात आला आहे. या हल्ल्यांमुळे तीन भारतीय नागरिकांचा नाहक बळी गेला आहे. नागरी जहाजांवर अशा प्रकारे प्राणघातक बळाचा वापर केल्याबद्दल मंत्रालयाने पुन्हा एकदा चिंता व्यक्त केली आहे. अशा आव्हानात्मक काळात या संवेदनशील प्रदेशात आंतरराष्ट्रीय सागरी व्यापाराची सुरक्षा आणि स्थिरता धोक्यात आणणाऱ्या या कारवाया अस्वीकारार्ह आहेत, असे भारताने अमेरिकेला स्पष्ट केले.
भारताने अमेरिकन दूतावासाच्या प्रधानांकडे मागणी केली आहे की, त्यांनी भारताची ही तीव्र चिंता त्यांच्या उच्च अधिकाऱ्यांपर्यंत पोहोचवावी. तसेच या भागात कार्यरत असलेल्या अमेरिकन सैन्याने नागरीकांचा जीव जाणार नाही याची खात्री करण्यासाठी सर्व आवश्यक उपाययोजना कराव्यात. ओमानच्या किनाऱ्याजवळ भारतीय क्रू मेंबर्स असलेल्या तीन व्यावसायिक जहाजांवर या आठवड्यात अमेरिकन लष्कराने हल्ले केल्याचे भारताने जाहीर केले आहे. अमेरिकन नौदलाने या जहाजांना लक्ष्य केल्याची भारताची ही पहिलीच जाहीर कबुली आहे.
परराष्ट्र मंत्रालयाचे प्रवक्ते रणधीर जयस्वाल यांनी स्पष्ट केले की, 'सेट्टेबेलो', 'मॅरिव्हेक्स' आणि 'जलवीर' या तीन जहाजांवर झालेले हल्ले अमेरिकन नौदलाकडून झाले होते. ८ जून रोजी २४ भारतीय खलाशांना घेऊन जाणारे 'मॅरिव्हेक्स' हे जहाज अमेरिकन सैन्याने निकामी केले होते, ज्यातील सर्व कर्मचाऱ्यांना सुखरूप वाचवण्यात आले.
मात्र, १० जून रोजी 'सेट्टेबेलो' जहाजावर झालेल्या हल्ल्यात २४ पैकी ३ भारतीय खलाशांचा मृत्यू झाला. ११ जून रोजी २० भारतीय असलेल्या 'जलवीर' जहाजावरही हल्ला झाला. यातील दोन जहाजांवर अमेरिकेच्या ट्रेझरी विभागाच्या ऑफिस ऑफ फॉरेन ॲसेट्स कंट्रोल (OFAC) कडून निर्बंध लादण्यात आले होते, तर एक जहाज नियमांचे पालन करत नसल्याचे वर्गीकृत करण्यात आले होते. ही संस्था इराणी आणि रशियन तेलाच्या विक्रीवरील अमेरिकन निर्बंधांचे उल्लंघन करणाऱ्या जहाजांवर कारवाई करते.
.jpeg)
