नवी दिल्ली 

जपानच्या पंतप्रधान साने ताकाइची (Sanae Takaichi) तीन दिवसीय अधिकृत दौऱ्यासाठी बुधवारी नवी दिल्लीत दाखल झाल्या आहेत. पंतप्रधान नरेंद्र मोदी यांच्या निमंत्रणावरून ताकाइची भारत दौऱ्यावर आल्या असून, १ ते ३ जुलै या काळात १६ वी भारत-जपान वार्षिक परिषद पार पडणार आहे. साने ताकाइची यांचा हा पहिलाच भारत दौरा आहे.

व्यापार आणि संरक्षण क्षेत्रावर चर्चा

पंतप्रधान ताकाइची गुरुवारी हैदराबाद हाऊस येथे पंतप्रधान नरेंद्र मोदी यांची भेट घेतील. या बैठकीत व्यापार, गुंतवणूक, संरक्षण आणि इतर प्रमुख क्षेत्रांमधील द्विपक्षीय सहकार्य अधिक दृढ करण्यावर दोन्ही नेत्यांमध्ये सविस्तर चर्चा होणार आहे. या भेटीमुळे भारत आणि जपानमधील 'विशेष धोरणात्मक आणि जागतिक भागीदारी' (Special Strategic and Global Partnership) अधिक बळकट होईल, असा विश्वास परराष्ट्र मंत्रालयाने व्यक्त केला आहे.

पंतप्रधान मोदी यांनी सोशल मीडिया 'एक्स'वर पोस्ट करत ताकाइची यांचे स्वागत केले. "तुमच्या पहिल्या भारत दौऱ्यावर तुमचे स्वागत करताना आम्हाला खूप आनंद होत आहे. उद्या होणाऱ्या व्यापक चर्चेसाठी मी उत्सुक आहे, ज्यामुळे भारत-जपान भागीदारी अधिक खोलवर जाईल," असे मोदींनी नमूद केले.

इंडो-पॅसिफिक क्षेत्रासाठी महत्त्व

परराष्ट्र मंत्रालयाचे प्रवक्ते रणधीर जयस्वाल यांनीही या दौऱ्याचे महत्त्व अधोरेखित केले. ही भेट भारत आणि जपानमधील संबंधांना एका नव्या उंचीवर नेणारी ठरेल. या परिषदेत केवळ द्विपक्षीय सहकार्यच नाही, तर इंडो-पॅसिफिक क्षेत्रातील शांतता, स्थैर्य आणि समृद्धी यांसारख्या प्रादेशिक आणि जागतिक मुद्द्यांवरही दोन्ही नेते विचारमंथन करतील. पंतप्रधान ताकाइची यांचे दिल्लीत आगमन झाल्यानंतर केंद्रीय मंत्री डॉ. जितेंद्र सिंह यांनी त्यांचे स्वागत केले.