तेलंगणा पोलिसांना नक्षलवाद्यांविरोधातील लढ्यात मोठे यश मिळाले आहे. प्रतिबंधित सीपीआय (माओवादी) पक्षाचा केंद्रीय समिती सदस्य माडवी हिडमा याचा अत्यंत जवळचा सहकारी आणि 'पीपल्स लिबरेशन गुरिल्ला आर्मी' (PLGA) बटालियन १ चा कमांडर बर्से देवा याने पोलिसांसमोर आत्मसमर्पण केले. त्याच्यावर २५ लाख रुपयांचे बक्षीस होते. तेलंगणाचे पोलीस महासंचालक डॉ. जितेंद्र यांच्या उपस्थितीत त्याने हे महत्त्वाचे पाऊल उचलले.
बर्से देवा हा मूळचा छत्तीसगडमधील सुकमा जिल्ह्यातील रहिवासी आहे. तो गेल्या अनेक वर्षांपासून नक्षलवादी चळवळीत सक्रिय होता. सुरक्षा दलांवर झालेल्या अनेक भीषण हल्ल्यांमध्ये त्याचा प्रत्यक्ष सहभाग होता. यामध्ये २०२० मध्ये मिनपा येथे झालेला हल्ला आणि २०२१ मध्ये टेकलगुडेम येथे झालेल्या चकमकीचा समावेश आहे. या दोन्ही घटनांमध्ये अनेक जवान शहीद झाले होते. त्याच्या क्रूरतेमुळे आणि हिंसक कारवायांमुळे तो सुरक्षा यंत्रणांच्या हिटलिस्टवर होता.
माओवादी संघटनेतील वरिष्ठ नेत्यांकडून होणारा भेदभाव आणि आरोग्याच्या समस्यांमुळे आपण हा निर्णय घेतल्याचे त्याने सांगितले. नक्षलवादी विचारसरणीवरचा विश्वास उडाल्याने त्याने मुख्य प्रवाहात परतण्याचा निर्णय घेतला. हिडमाचा उजवा हात मानला जाणारा देवा पोलिसांना शरण आल्यामुळे माओवादी संघटनेला आणि विशेषतः बटालियन १ ला मोठा धक्का बसला आहे.
आत्मसमर्पण केल्यानंतर त्याला शासनाच्या पुनर्वसन धोरणांनुसार मदत मिळणार आहे. त्याला तत्काळ मदतीचा भाग म्हणून काही रक्कम आणि वैद्यकीय उपचारांची सोय उपलब्ध करून देण्यात आली. इतर नक्षलवाद्यांनीही हिंसाचाराचा मार्ग सोडून मुख्य प्रवाहात सामील व्हावे आणि लोकशाही मार्गाचा स्वीकार करावा, असे आवाहन पोलिसांनी यावेळी केले.
.jpeg "झाकीर हुसेन")
