मुंबई 

महाराष्ट्र लोकसेवा आयोगामार्फत (MPSC) घेतल्या जाणाऱ्या परीक्षा आता 'कॉम्प्युटर-बेस्ड टेस्ट' (CBT) म्हणजेच ऑनलाइन पद्धतीने घेतल्या जाणार आहेत. ही भरती प्रक्रिया अधिक वेगवान, पारदर्शक आणि कार्यक्षम करण्यासाठी राज्य सरकारने हा निर्णय घेतला आहे, अशी माहिती माहिती आणि तंत्रज्ञान मंत्री आशिष शेलार यांनी मंगळवारी विधान परिषदेत दिली.

बदल का गरजेचा?

सामान्य प्रशासन विभागाशी संबंधित विषयांवर चर्चा करताना मंत्री आशिष शेलार म्हणाले की, २०२० मधील सरकारी निर्णयानुसार विविध विभागांतील मोठ्या संख्येने पदे MPSC कडे वर्ग करण्यात आली आहेत. पूर्वी आयोग दरवर्षी ७,००० ते ७,५०० पदांची भरती करत असे, परंतु आता हा आकडा ५०,००० ते ६०,००० पर्यंत जाण्याची शक्यता आहे. अशा परिस्थितीत, ऑफलाइन परीक्षांसाठी शाळा आणि महाविद्यालयांवर अवलंबून राहणे आव्हानात्मक ठरत आहे. इतर केंद्रीय आणि बँक परीक्षांच्या काळामुळे परीक्षा केंद्रे मिळणे कठीण होत असल्याने, सीबीटी (CBT) हा एक प्रभावी उपाय असल्याचे शेलार यांनी सांगितले.

ग्रामीण भागातील विद्यार्थ्यांच्या शंकांचे निरसन

ग्रामीण भागातील विद्यार्थ्यांच्या समस्यांचा विचार सरकारने केला असल्याचे सांगत, शेलार यांनी विविध केंद्रीय परीक्षांचे उदाहरण दिले. कॅट (CAT), जेईई (JEE), एसएससी (SSC) आणि आयबीपीएस (IBPS) सारख्या परीक्षा देशभरातील विद्यार्थी ऑनलाइन पद्धतीनेच देत आहेत, त्यामुळे MPSC साठी ही पद्धत लागू करणे शक्य असल्याचे ते म्हणाले.

पारदर्शकता वाढवण्यासाठी, परीक्षार्थींना त्यांच्या उत्तरपत्रिका पाहण्याची सुविधा दिली जाईल. तसेच, एकापेक्षा जास्त शिफ्टमध्ये परीक्षा झाल्यास सर्वोच्च न्यायालयाच्या मार्गदर्शक तत्त्वांनुसार गुणांचे नॉर्मलायझेशन केले जाईल. ही प्रक्रिया पूर्णपणे पारदर्शक असेल आणि MPSC च्या परीक्षांचे खाजगीकरण केले जाणार नाही, असेही त्यांनी स्पष्ट केले. केवळ पायाभूत सुविधांसाठी टीसीएस (TCS) सारख्या एजन्सीची मदत घेतली जाईल, असे शेलार यांनी स्पष्ट केले.