गिर सोमनाथ 

पंतप्रधान नरेंद्र मोदी यांनी रविवारी (११ जानेवारी २०२६) गुजरातच्या गिर सोमनाथ जिल्ह्यात 'शौर्य यात्रे'चे नेतृत्व केले. सोमनाथ मंदिराच्या रक्षणासाठी आपल्या प्राणांची आहुती देणाऱ्या शूरवीरांच्या स्मृतीप्रत्यर्थ या भव्य मिरवणुकीचे आयोजन करण्यात आले होते. 'सोमनाथ स्वाभिमान पर्वा'चा भाग असलेल्या या यात्रेत १०८ घोडे सहभागी झाले होते, जे त्याग आणि शौर्याचे प्रतीक मानले जातात.

सुमारे एक किलोमीटर लांबीच्या या यात्रेत पंतप्रधान मोदी एका विशेष वाहनावर स्वार होऊन जनतेला अभिवादन करत होते. त्यांच्यासोबत गुजरातचे मुख्यमंत्री भूपेंद्र पटेल देखील उपस्थित होते. रस्त्याच्या दुतर्फा हजारो भाविकांनी पंतप्रधानांचे जल्लोषात स्वागत केले.

 ३००० ड्रोनचा दिमाखदार शो 

शनिवारी रात्री सोमनाथ मंदिर परिसरात ३,००० ड्रोनचा वापर करून एक भव्य 'ड्रोन शो' सादर करण्यात आला. या शोमध्ये प्रभू शिव, शिवलिंग आणि सोमनाथ मंदिराची त्रिमितीय (3D) प्रतिमा आकाशात साकारण्यात आली होती. विशेष म्हणजे, ड्रोनच्या माध्यमातून मंदिरावर झालेली आक्रमणे आणि त्यानंतर झालेले त्याचे पुनरुत्थान याचे चित्रणही करण्यात आले. पंतप्रधान मोदींनी स्वतः या नेत्रदीपक सोहळ्याचा आनंद घेतला.

 दिव्य रोषणाई आणि शिवमय वातावरण 

सोमनाथ मंदिर परिसर आणि शहराला फुलांनी तसेच दिव्यांनी सजवण्यात आले आहे. 'शंख सर्कल'पासून ते 'वीर हमीरजी गोहिल सर्कल'पर्यंतचा रस्ता त्रिशूळ, 'ओम' आणि डमरूच्या आकाराच्या दिव्यांनी उजळून निघाला आहे. शहरात 'अखंड सोमनाथ, अखंड भारत' आणि 'प्रहारातून पुनरुत्थानाचा साक्षीदार, मी स्वयंभू सोमनाथ आहे' अशा आशयाचे मोठे बॅनर्स लावले असून संपूर्ण वातावरण शिवमय झाले आहे.

 इतिहासाचे स्मरण 

हे 'स्वाभिमान पर्व' महमूद गझनीने सोमनाथ मंदिरावर केलेल्या आक्रमणाला १,००० वर्षे पूर्ण झाल्याच्या निमित्ताने आयोजित केले आहे. स्वातंत्र्यानंतर सरदार वल्लभभाई पटेल यांनी या मंदिराच्या जिर्णोद्धाराचा संकल्प सोडला होता. १९५१ मध्ये तत्कालीन राष्ट्रपती डॉ. राजेंद्र प्रसाद यांच्या उपस्थितीत हे मंदिर भक्तांसाठी खुले करण्यात आले होते. या ऐतिहासिक वारशाचा सन्मान करण्यासाठी देशभरातून भाविक सोमनाथमध्ये दाखल झाले आहेत.

मुंबईहून आलेल्या २३ महिलांच्या एका भजन मंडळाने सांगितले की, "पंतप्रधानांना पाहण्यासाठी आणि सोमनाथच्या या ऐतिहासिक सोहळ्याचा अनुभव घेण्यासाठी आम्ही खास प्रवास करून आलो आहोत. येथील रोषणाई आणि उत्साह पाहून भारावून गेलो आहोत."

पंतप्रधानांनी मंदिरात 'ओमकार मंत्रा'चा उच्चार करत दर्शन घेतले आणि पूजाअर्चा केली. या दोन दिवसीय दौऱ्यानंतर पंतप्रधान राजकोटसाठी रवाना झाले. ८ ते ११ जानेवारी दरम्यान चाललेल्या या 'स्वाभिमान पर्वा'ने सोमनाथमध्ये एक नवा इतिहास रचला आहे.