खलिस्तान समर्थक अमृतपालसिंग याच्या मुसक्या आवळण्यासाठी पंजाब पोलिसांची आज सलग तिसऱ्या दिवशी शोध मोहीम सुरू होती. अमृतपाल हा पोलिसांच्या हाती लागला नसला तरीसुद्धा त्याचे काका आणि चालकाने जालंधरमध्ये पोलिसांसमोर शरणागती पत्करली. राज्यातील कायदा सुव्यवस्था बिघडू नये म्हणून तूर्त इंटरनेट आणि एसएमएस सेवा मंगळवार (ता.२१)दुपारपर्यंत बंद ठेवण्यात आली आहे. अमृतपालचे काका हरजित सिंग आणि त्यांचा चालक हरप्रितसिंग यांनी रविवारी रात्री मेहातपूर भागातील बुलंदपूर गुरुद्वारा येथे शरणागती पत्करली. यावेळी पोलिस उपमहानिरीक्षक (बॉर्डर रेंज) नरेंद्र भार्गव आणि अन्य पोलिस अधिकारी उपस्थित होते.
हरजितसिंग शरणागती पत्कारत असतानाचे काही व्हिडिओ प्रसिद्ध करण्यात आले असून यावेळी त्यांच्याकडे ३२ बोअरचे पिस्तूल एक ते सव्वा लाख रुपये रोख रक्कम होती. एका तस्कराकडून खरेदी करण्यात आलेल्या आलिशान मर्सिडीज कारमध्ये बसून ते पोलिस ठाण्यात आले. पोलिसांनी तूर्त ही कार देखील जप्त केली आहे. हरजित आणि हरप्रित यांचा ताबा अमृतसर ग्रामीण पोलिसांकडे आहे. गायक आणि पंजाबी कार्यकर्ता दीप सिद्धू याने स्थापन केलेल्या ‘वारिस पंजाब दे’ ही संघटना ताब्यात घेण्यासाठी हरजित यांनीच अमृतपालला मदत केल्याचे बोलले जाते. हरजित यांनीच वेळोवेळी अमृतपालचे समर्थन केल्याची बाब उघड झाली आहे. आपल्या साथीदारांच्या सुटकेसाठी अंजाला पोलिस ठाण्यावर सशस्त्र जमावासह हल्ला केल्याप्रकरणी अमृतपाल आणि त्याच्या सहकाऱ्यांविरोधात कारवाई करण्यात येत आहे. पोलिसांनी याआधीच त्यांच्याविरोधात गुन्हेही नोंदविले आहेत.