टोरंटो 

भारत हा जगातील कोणतीही 'महाशक्ती' बनून नाही, तर मानवतेची निस्वार्थ सेवा करून 'विश्वगुरु' बनला आहे, असे स्पष्ट प्रतिपादन राष्ट्रीय स्वयंसेवक संघाचे (RSS) सरसंघचालक मोहन भागवत यांनी केले आहे. कॅनडातील टोरंटो येथे आयोजित 'हिंदू विश्व बंधू - आलिंगन जगाला मैत्रीत' या विशेष कार्यक्रमात ते भारतीय समुदायाला संबोधित करत होते. भारताचे संस्कृतीगत डीएनए हे सार्वत्रिक मैत्री, आश्रय आणि विविधतेच्या आदरावर आधारलेले आहे, असे त्यांनी आवर्जून सांगितले.

यावेळी बोलताना मोहन भागवत यांनी भारताच्या ऐतिहासिक आणि आधुनिक कामगिरीचा विशेष उल्लेख केला. दुसऱ्या महायुद्धाच्या काळात पोलंडमधून जीव वाचवून पळालेल्या निर्वासितांना जामनगरच्या महाराजांनी दिलेला आश्रय असो किंवा अलीकडच्या काळात पश्चिम आशियातील युद्धकाळात भारतीय लष्कराने केवळ स्वतःच्याच नव्हे तर इतर सात देशांच्या नागरिकांना सुरक्षित बाहेर काढले, यांसारख्या अनेक घटना त्यांनी अधोरेखित केल्या. जगभरात कुठेही छळ झालेल्या लोकांना भारतातच हक्काचा आश्रय मिळाला आहे, असे सांगत त्यांनी भारताच्या या ऐतिहासिक परंपरेचा गौरव केला.

भारताची संस्कृती आणि वसुधैव कुटुम्बकम्

भारताचे पूर्वज मेक्सिकोपासून सायबेरियापर्यंत आणि दक्षिण-पूर्व आशियापर्यंत पोहोचले, परंतु त्यांनी कधीही कोणत्याही देशावर आक्रमण केले नाही किंवा साम्राज्य विस्तार केला नाही. त्यांनी जगात फक्त ज्ञान, खगोलशास्त्र, आयुर्वेद आणि जीवनमूल्ये पसरवली, असे भागवत यांनी नमूद केले. हिंदू तत्वज्ञानाचा अर्थ स्पष्ट करताना ते म्हणाले की, हिंदू ही ओळख कोणतीही एक भाषा किंवा विशिष्ट पूजेपुरती मर्यादित नसून ती सर्वसमावेशक आहे. 'वसुधैव कुटुम्बकम्' ही भारताची मूळ संस्कृती असून संपूर्ण जग हे एक कुटुंब आहे, अशी भावना त्यांनी व्यक्त केली.