नवी दिल्ली 

अमेरिकेतील न्यूयॉर्क येथील मॅडिसन स्क्वेअर गार्डनबाहेर राष्ट्रीय राष्ट्रध्वजाचा अवमान करणाऱ्या आंदोलक आणि खलिस्तानी समर्थकांना केंद्रीय मंत्री किरेन रिजिजू यांनी कडक शब्दांत इशारा दिला आहे. राष्ट्रीय स्वयंसेवक संघाचे (RSS) सरसंघचालक मोहन भागवत यांच्या भाषण कार्यक्रमादरम्यान काही जणांनी भारताच्या राष्ट्रध्वजावर पाय ठेवल्याचा आणि तो टरकावल्याचा व्हिडिओ समोर आल्यानंतर एकच संताप व्यक्त होत आहे.

राजकीय मतभेद असू शकतात, मात्र देशाचा अपमान करणे कधीही सहन केले जाणार नाही, असे स्पष्ट शब्दांत किरेन रिजिजू यांनी सोशल मीडियावर म्हटले आहे. "तुम्हाला आरएसएस, भाजप किंवा सरकारवर टीका करण्याचा अधिकार आहे, पण आमच्या देशाचा आणि राष्ट्रध्वजाचा अपमान करू नका. हे तुम्हाला खूप महागात पडेल," असा इशारा त्यांनी दिला. न्यूयॉर्कमधील या घटनेदरम्यान काही प्रदर्शनकर्त्यांनी राष्ट्रध्वजाचा अपमान करत घोषणाबाजी केली होती, ज्याची गंभीर दखल आता केंद्र सरकारने घेतली आहे. सोशल मीडियावरही या कृत्याविरोधात संताप व्यक्त होत असून परदेशातील संबंधितांवर कायदेशीर कारवाई करण्याची मागणी होत आहे.

मोहन भागवत यांचे न्यूयार्कमधील संबोधन

दरम्यान, मोहन भागवत सध्या त्यांच्या जागतिक दौऱ्याचा भाग म्हणून अमेरिका, कॅनडा आणि ब्रिटनच्या दौऱ्यावर आहेत. राष्ट्रीय स्वयंसेवक संघाच्या शतकोत्सव वर्षानिमित्त न्यूयॉर्कमध्ये आयोजित कार्यक्रमात त्यांनी उपस्थितांना मार्गदर्शन केले. यावेळी त्यांनी परदेशात राहणाऱ्या भारतीय समुदायाने आपल्या कर्मभूमीशी (ज्या देशात राहत आहेत) पूर्णपणे प्रामाणिक राहण्याचे आवाहन केले. "आपण अमेरिकेत राहतो, अमेरिकेत कमावतो, त्यामुळे आपण तिथल्याप्रती निष्ठावान असले पाहिजे," असे भागवत म्हणाले. मानवतेवर प्रेम करणे आणि इतरांचा विचार करणे हीच आपली संस्कृती असल्याचे त्यांनी अधोरेखित केले.