न्यूयॉर्क 

संयुक्त राष्ट्र सुरक्षा परिषदेत (UNSC) भारताच्या स्थायी सदस्यत्वाच्या दाव्याला रशियाने स्पष्ट शब्दांत पाठिंबा जाहीर केला आहे. संयुक्त राष्ट्रांच्या सुधारणांमध्ये कोणत्याही पश्चिम देशांना, विशेषतः जर्मनी आणि जपानला अतिरिक्त जागा मिळू नयेत, अशी रशियाची भूमिका असल्याचे रशियाचे परराष्ट्र मंत्री सर्गेई लावरोव यांनी स्पष्ट केले आहे.

संयुक्त राष्ट्र महासभेच्या (UNGA) अधिवेशनात आपल्या भाषणात लावरोव यांनी भारताच्या भूमिकेचे समर्थन केले.

पश्चिम देशांच्या समावेशावर रशियाचा आक्षेप

रशियाचे परराष्ट्र मंत्री सर्गेई लावरोव यांनी सांगितले की, आमचे धोरणात्मक मत स्पष्ट आहे की, संयुक्त राष्ट्र सुरक्षा परिषदेच्या सुधारणांमध्ये पाश्चात्त्य देशांना, विशेषतः जर्मनी आणि जपानला अतिरिक्त जागा मिळायला नकोत, कारण हे देश आता सैन्याभिमुखता आणि फेरबदलाच्या मार्गावर चालले आहेत.

आशिया, आफ्रिका आणि लॅटिन अमेरिकेच्या प्रतिनिधित्वावर भर

लावरोव पुढे म्हणाले की, आम्ही आशिया, आफ्रिका आणि लॅटिन अमेरिकेचे प्रतिनिधित्व वाढवण्याच्या बाजूने आहोत. आम्ही ब्राझील आणि भारताच्या स्थायी सदस्यत्वाच्या दाव्याचे समर्थन करतो. त्याचबरोबर आफ्रिका खंडाच्या हितसंबंधांचीही पूर्तता करणे गरजेचे असल्याचे त्यांनी नमूद केले. रशिया आपल्या मित्रदेशांसोबत आणि धोरणात्मक भागीदारांसोबत जसे की ब्रिक्स (BRICS), एससीओ (SCO) आणि युरेशियन आर्थिक युनियनच्या माध्यमातून जागतिक परिस्थिती सुधारण्याचा प्रयत्न करत असल्याचे त्यांनी सांगितले.