ढाका

बांगलादेशच्या माजी पंतप्रधान खलिदा झिया यांच्या अंत्यसंस्काराच्या निमित्ताने ढाका येथे भारत आणि पाकिस्तानच्या नेत्यांमध्ये एक दुर्मिळ शिष्टाचार पाहायला मिळाला. भारताचे परराष्ट्र मंत्री एस. जयशंकर आणि पाकिस्तानच्या नॅशनल असेंब्लीचे सभापती सरदार अयाज सादिक यांची बुधवारी संक्षिप्त भेट झाली.

'ऑपरेशन सिंदूर' नंतर भारत आणि पाकिस्तानच्या उच्चपदस्थ नेत्यांमधील हा पहिलाच उच्चस्तरीय संपर्क ठरला आहे. अंत्यसंस्काराचा मुख्य कार्यक्रम सुरू होण्यापूर्वी या दोन्ही नेत्यांनी एकमेकांशी हस्तांदोलन केले आणि शुभेच्छांची देवाणघेवाण केली. भारत आणि पाकिस्तानमधील सध्याचे ताणलेले संबंध पाहता, या औपचारिक भेटीने सर्वांचे लक्ष वेधून घेतले आहे.

बांगलादेशचे मुख्य सल्लागार मोहम्मद युनूस यांनी या भेटीचे फोटो सोशल मीडिया प्लॅटफॉर्म 'X' वर शेअर केले आहेत. त्यांनी आपल्या पोस्टमध्ये म्हटले की, "पाकिस्तानच्या नॅशनल असेंब्लीचे सभापती सरदार अयाज सादिक यांनी बुधवारी ढाका येथे माजी पंतप्रधान खलिदा झिया यांच्या अंत्यसंस्कारापूर्वी भारताचे परराष्ट्र मंत्री एस. जयशंकर यांची भेट घेऊन शुभेच्छांची देवाणघेवाण केली."

भारत आणि पाकिस्तानमधील राजनैतिक संबंध सध्या अत्यंत नाजूक वळणावर असताना, एका आंतरराष्ट्रीय व्यासपीठावर झालेला हा संक्षिप्त संवाद भविष्यातील घडामोडींच्या दृष्टीने महत्त्वाचा मानला जात आहे.