अमरनाथ यात्रा, बकरी ईदच्या पार्श्वभूमीवर जम्मू-काश्मीरमध्ये चोख सुरक्षा व्यवस्था

Story by आवाज़ मराठी | Published by Fazal Pathan • 2 d ago

प्रातिनिधिक चित्र

जम्मू-काश्मीरचे पोलीस महासंचालक (डीजीपी) नलिन प्रभात यांनी सोमवारी २ जून २०२५ रोजी श्रीनगरमधील पोलीस नियंत्रण कक्षात पोलीस आणि केंद्रीय सशस्त्र पोलीस दल (CAPF) अधिकाऱ्यांसह संयुक्त बैठक घेतली. यात श्री अमरनाथजी यात्रा-२०२५, बकरी ईद आणि आगामी कार्यक्रमांसाठी सुरक्षा व्यवस्थेचा आढावा घेतला गेला.

बैठकीत अधिकाऱ्यांनी अमरनाथ यात्रा आणि बकरी ईदसाठी प्रस्तावित सुरक्षा व्यवस्थेची माहिती दिली. विविध दलांमधील समन्वयावर भर देण्यात आला. डीजीपी प्रभात यांनी मानक कार्यप्रणाली (SOPs) लागू करण्याचे निर्देश दिले आणि जोखीम कमी करण्यासाठी सक्रिय उपाययोजनांवर जोर दिला. “दहशतवादी परिसंस्थेला उद्ध्वस्त करण्यासाठी प्रयत्न तीव्र करा,” असं त्यांनी सांगितलं (ANI न्यूज एक्स पोस्ट).

यात्रा मार्गांवर अँटी-सॅबोटेज पथकं तैनात करण्याचे आणि प्रगत तंत्रज्ञान, रिअल-टाइम देखरेखीने धोका शोधण्याची क्षमता वाढवण्याचे आदेश त्यांनी दिले. सर्व कार्यक्रम यशस्वी आणि सुरक्षितपणे पार पाडण्यासाठी सर्वोच्च तयारी आणि समन्वय राखण्याचा निर्धार बैठकीत झाला.

बैठकीला विशेष डीजीपी समन्वय एस.जे.एम. गिलानी, एडीजीपी सशस्त्र आनंद जैन, आयजीपी काश्मीर, आयजी सीआरपीएफ श्रीनगर, आयजी बीएसएफ, काश्मीर झोनचे सर्व डीआयजी, डीआयजी ट्रॅफिक, डीआयजी आयटीबीपी, सर्व जिल्हा एसएसपी आणि वरिष्ठ अधिकारी उपस्थित होते.

श्री अमरनाथजी यात्रा ३ जुलै ते ९ ऑगस्टदरम्यान होणार आहे. बाबा बर्फानींच्या दर्शनासाठी येणाऱ्या भाविकांचा सुरक्षित प्रवास आणि आध्यात्मिक अनुभव सुनिश्चित करण्यासाठी विभागांमधील समन्वय, लवकर सुरक्षा तैनाती आणि सुव्यवस्थित नियोजनावर भर आहे.

बकरी ईद, ज्याला ‘त्यागाचा सण’ म्हणतात, इस्लामी कॅलेंडरच्या धु अल-हिज्जा महिन्याच्या १०व्या दिवशी साजरी होते. यंदा ७ जून रोजी हा सण साजरा होण्याची शक्यता आहे. हजरत इब्राहिम यांनी अल्लासाठी सर्वस्व त्यागण्याची तयारी दाखवली, याची आठवण हा सण करून देतो.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter