नवी दिल्ली

पर्यावरणवादी कार्यकर्ते सोनम वांगचुक यांनी आपले २६ दिवसांचे आमरण उपोषण मागे घेतल्यानंतर, कॉकरोच जनता पार्टीने (CJP) आपले आंदोलन सुरूच राहणार असल्याचे जाहीर केले आहे. जोपर्यंत केंद्रीय शिक्षण मंत्री धर्मेंद्र प्रधान राजीनामा देत नाहीत, तोपर्यंत दिल्लीच्या जंतरमंतरवरील शांततापूर्ण निदर्शने सुरूच राहतील, अशी भूमिका CJP ने स्पष्ट केली आहे.

CJP चे संस्थापक अभिजित दिपके यांनी सोशल मीडिया प्लॅटफॉर्म 'एक्स'वर पोस्ट करून सोनम वांगचुक यांनी उपोषण समाप्त केल्याबद्दल आनंद व्यक्त केला आणि त्यांचे आभार मानले. "सोनम सर यांनी २६ दिवसांनंतर आमरण उपोषण समाप्त केले, याचा आम्हाला मोठा दिलासा मिळाला आहे. त्यांनी दाखवलेल्या असाधारण धैर्याबद्दल आम्ही कृतज्ञ आहोत. आपल्या प्राणांना धोक्यात घालून त्यांनी संपूर्ण देशाची विवेकबुद्धी जागी केली आहे," असे दिपके यांनी आपल्या संदेशात म्हटले आहे.

केंद्र सरकारने आंदोलक विद्यार्थ्यांवर कोणतीही दंडात्मक कारवाई न करण्याचे आश्वासन दिल्यानंतर आणि परीक्षा सुधारणांच्या मुद्द्यांवर सकारात्मक चर्चा करण्याचे मान्य केल्यानंतर वांगचुक यांनी गुरुवारी रात्री उशिरा आपले उपोषण सोडले होते. त्यानंतर CJP ने स्पष्ट केले की, शिक्षण क्षेत्रातील गैरप्रकारांविरोधातील लढा आणि मंत्र्यांच्या राजीनाम्याची मागणी कायम आहे.