हज २०२६ साठी जाणाऱ्या यात्रेकरूंना केंद्र सरकारच्या अल्पसंख्यक कार्य मंत्रालयाने मोठा दिलासा दिला आहे. हज यात्रेसाठी आवश्यक असलेली बुकिंग आणि इतर कायदेशीर प्रक्रिया पूर्ण करण्यासाठी आता २५ जानेवारी २०२६ पर्यंत अंतिम मुदतवाढ देण्यात आली आहे. मंत्रालयाच्या हज विभागाने १५ जानेवारीला याबाबतचे एक अधिकृत परिपत्रक जारी केले आहे.
मंत्रालयाने यापूर्वी ४ डिसेंबर २०२५ रोजी एक सूचना जारी केली होती. त्यानुसार, तात्पुरती निवड झालेल्या यात्रेकरूंना १५ जानेवारी २०२६ पर्यंत हज २०२६ साठी आवश्यक सर्व कायदेशीर सोपस्कार आणि बुकिंगशी संबंधित गोष्टी पूर्ण करायच्या होत्या. सौदी अरेबियाने घालून दिलेल्या वेळेचे पालन व्हावे आणि शेवटच्या क्षणी होणारी धावपळ टळावी, यासाठी ही मुदत देण्यात आली होती.
मात्र, अनेक यात्रेकरू आणि इतर संबंधितांकडून ही मुदत वाढवून मिळावी, अशी मागणी करणारे अर्ज मंत्रालयाला प्राप्त झाले होते. यात्रेकरूंचे व्यापक हित लक्षात घेऊन आणि त्यांच्या विनंतीचा विचार करून मंत्रालयातील सक्षम प्राधिकाऱ्यांनी हा निर्णय घेतला आहे. त्यानुसार, उर्वरित सर्व प्रक्रिया पूर्ण करण्यासाठी २५ जानेवारी २०२६ पर्यंत अंतिम मुदतवाढ देण्यात आली आहे.
या वाढीव कालावधीत यात्रेकरूंना खालील गोष्टींची पूर्तता करणे अनिवार्य आहे :
१) आपली बुकिंग प्रक्रिया पूर्ण करणे.
२) आपले वैध पासपोर्ट हज कमिटी ऑफ इंडिया (HCoI) किंवा संबंधित हज ग्रुप ऑर्गनायझर्सकडे (HGOs) जमा करणे.
३) 'नुसुक' (Nusuk) पोर्टलवर आपली नोंदणी यशस्वीरित्या पूर्ण झाल्याची खात्री करणे.
फसवणूक टाळण्यासाठी आवाहन
मंत्रालयाने यात्रेकरूंना सावधगिरीचा इशाराही दिला आहे. खाजगी टूर्स ऑपरेटर किंवा हज ग्रुप ऑर्गनायझर्स (HGOs/PTOs) यांच्यामार्फत बुकिंग करण्यापूर्वी त्यांची नोंदणी स्थिती, त्यांना मंजूर झालेला कोटा आणि त्यांची मान्यता या गोष्टींची शहानिशा करावी. केवळ अधिकृत हज ग्रुप ऑर्गनायझर्सकडूनच बुकिंग करावे, जेणेकरून फसवणूक होणार नाही.
ही मुदतवाढ अंतिम स्वरूपाची आहे. २५ जानेवारी २०२६ नंतर कोणत्याही परिस्थितीत पुन्हा मुदत वाढवून मिळणार नाही, असे मंत्रालयाने स्पष्ट केले आहे. त्यामुळे सर्व यात्रेकरूंनी दिलेल्या वेळेतच आपली प्रक्रिया पूर्ण करावी, असे आवाहन मंत्रालयाकडून परिपत्रकाद्वारे करण्यात आले आहे.
