कुराण हे अल्लाने मानवजातीसाठी दिलेले एक पवित्र पुस्तक आहे. अनेकदा लोक या ग्रंथाला केवळ इस्लाम धर्मापुरते मर्यादित मानतात, परंतु प्रत्यक्षात अल्लाने पवित्र कुराण संपूर्ण मानवजातीसाठी पाठवले आहे. ज्या कोणालाही सन्मार्गावर चालायचे आहे, त्या प्रत्येक व्यक्तीने कुराणचा अभ्यास करणे आवश्यक आहे.

पवित्र कुराण मूळतः अरबी भाषेत आहे, मात्र काळाप्रमाणे त्याचे विविध भाषांत अनुवाद झाले आहेत. भारतासारख्या देशात बहुतांश लोकांना अरबी भाषा समजत नाही. मुस्लीम समाजातील लोक बालपणी थोड्या-फार प्रमाणात अरबीचे शिक्षण घेतात, पण त्यांना शब्दांचे अर्थ उमजत नाहीत. त्यामुळे कुराणमध्ये अल्लाने काय संदेश दिला आहे, हे जाणून घेण्यासाठी त्यांना धार्मिक विद्वानांवर अवलंबून राहावे लागते. आता मात्र मातृभाषेत कुराण उपलब्ध झाल्यामुळे लोक स्वतः तो ग्रंथ वाचू आणि समजू शकतात.

यूट्यूबवर आसामी ऑडिओ कुराण उपलब्ध

कुराणमध्ये नेमके काय आहे, हे जाणून घेणे आता अधिक सोपे झाले आहे. यूट्यूबवर पवित्र कुराणची आसामी ऑडिओ आवृत्ती उपलब्ध झाली आहे. इस्लामिक विद्वान मौलाना नुरुल अमीन कासिमी यांच्या नेतृत्वाखाली हा प्रकल्प साकारला आहे. मौलाना कासिमी सांगतात की, होजाई येथील जलालिया मदरसाचे शेख-उल-हदीस हजरत मौलाना शमसुद्दीन साहेब यांनी त्यांना हे महान कार्य करण्याची प्रेरणा दिली.

चार वर्षांची मेहनत आणि जागतिक सहयोग

सलग चार वर्षांच्या अथक परिश्रमानंतर कुराणची ही आसामी ऑडिओ आवृत्ती पूर्ण झाली आहे. यातील संपूर्ण अनुवाद मौलाना नुरुल अमीन कासिमी यांनी केला आहे. विशेष म्हणजे, अरबी भाषेतील मूळ पठणासाठी सौदी अरेबियाचे इमाम आणि कारी अब्दुल्ला यांनी आपला आवाज दिला आहे, तर आसामी अनुवादासाठी स्वतः मौलाना कासिमी यांनी आवाज दिला आहे.

धार्मिक सलोख्याचे अनोखे उदाहरण

या कार्यादरम्यान सामाजिक सलोख्याचे एक सुंदर उदाहरण पाहायला मिळाले. संपूर्ण कुराणच्या रेकॉर्डिंगचे काम अंकुर सैकिया या एका हिंदू तरुणाच्या स्टुडिओत पूर्ण झाले. मौलाना कासिमी सांगतात, "आम्हाला रेकॉर्डिंगसाठी स्टुडिओची गरज होती. जेव्हा मी अंकुरला याबद्दल विचारले, तेव्हा त्याने अत्यंत आनंदाने आणि उत्साहाने त्याच्या स्टुडिओत आम्हाला काम करण्याची परवानगी दिली."

कुराण सर्व मानवजातीसाठी मार्गदर्शक

ज्यांना कुराण वाचता येत नाही पण त्यातील संदेश जाणून घेण्याची इच्छा आहे, त्यांच्यासाठी ही ऑडिओ आवृत्ती अत्यंत उपयुक्त आहे. मौलाना कासिमी यांच्या मते, कुराण केवळ मुस्लिमांसाठी नाही, तर हे मार्गदर्शन शोधणाऱ्या प्रत्येक मानवासाठी आहे. कुराणमध्ये प्रत्येक जाती आणि धर्माच्या लोकांसाठी जगण्याचा मार्ग दाखवला आहे.

कुराणचा अर्थ वाचण्याबाबत बोलताना मौलाना कासिमी म्हणाले की, "कोणीही कुराणचा अर्थ वाचू शकतो, त्यात कोणतीही अडचण नाही. मुख्य उद्देश हा ग्रंथ समजून घेणे हा आहे. मात्र, कुराणचे अर्थ विविध संदर्भात बदलू शकतात, त्यामुळे ते वाचताना एखाद्या 'आलिम'चे (विद्वानाचे) मार्गदर्शन घेतल्यास त्याचा अर्थ अधिक चांगल्या प्रकारे समजून घेता येतो."

आगामी योजना

आसामी ऑडिओ आवृत्तीनंतर आता मौलाना नुरुल अमीन कासिमी कुराणच्या 'तफसीर'चे (निरुपणचे) ऑडिओ यूट्यूबवर प्रसिद्ध करण्याची योजना आखत आहेत. या कामासाठी आर्थिक मदतीची आवश्यकता असून, मदत मिळाल्यास हे कार्य लवकरच पूर्ण होईल, असा विश्वास त्यांनी व्यक्त केला आहे.

ज्यांना हे आसामी ऑडिओ कुराण ऐकायचे आहे, ते यूट्यूबवर 'Assamese Translation of Quran' किंवा 'Nurul Amin Qasimi' असे शोधू शकतात. 'Voice of Assamese Quran' या यूट्यूब चॅनेलवर हे सर्व भाग उपलब्ध आहेत.