मन्सूरुद्दीन फरिदी

इंदूरमध्ये एका चिमुकलीचा जीव वाचवण्यासाठी सध्या एक मोठी मोहीम सुरू आहे. ही मोहीम केवळ माणुसकीचे उत्तम उदाहरण नाही. तर ती धर्म, जात आणि समुदायाच्या पलीकडे गेलेल्या एकजुटीचे मोठे प्रतीक बनली आहे. तीन वर्षांची अनिका शर्मा एका अत्यंत गंभीर आजाराशी झुंज देत आहे. तिच्या उपचारांसाठी सर्व स्तरांतील आणि सर्व धर्मांचे लोक एकत्र आले आहेत. अनिकाला 'स्पायनल मस्क्युलर अ‍ॅट्रोफी टाईप २' नावाचा आजार जडला आहे. यात शरीरातील स्नायू हळूहळू कमकुवत होत जातात. यावरील उपचारही अत्यंत महागडा आहे. या आजारावर 'झोल्जेन्स्मा' नावाचे जीन-थेरपी इंजेक्शन हा एकमेव खात्रीशीर उपाय आहे. या इंजेक्शनची किंमत तब्बल नऊ कोटी रुपये आहे.

एवढी मोठी रक्कम उभी करणे कोणत्याही सर्वसामान्य कुटुंबासाठी आवाक्याबाहेरची गोष्ट आहे. पण शहरातील अनेक स्वयंसेवी संस्थांनी एकत्र येत क्राउडफंडिंग मोहीम सुरू केली आहे. स्वयंसेवक घरोघरी आणि गल्लोगल्ली फिरून देणगी गोळा करत आहेत. नागरिकही सढळ हाताने मदत करत आहेत. या मोहिमेचे सर्वात मोठे वैशिष्ट्य म्हणजे यात धर्म किंवा जात पाहिली जात नाहीये. यात केवळ एका निष्पाप जिवाला वाचवण्याची धडपड दिसून येत आहे. अनिकाचे कुटुंबीय तिच्यासाठी पैसे उभे करण्याच्या कामात रात्रंदिवस व्यस्त आहेत.

इंदूरमधील मुस्लिम बहुल भागांतील नागरिक या मोहिमेत हिरीरीने सहभाग घेत आहेत. स्वयंसेवी संस्थेचे कार्यकर्ते बंबई बाजार भागात पोहोचले. तिथे त्यांना माणुसकी आणि दयेचे खऱ्या अर्थाने दर्शन घडले. रमजानच्या पवित्र महिन्यात स्थानिक नगरसेवक, दुकानदार आणि उपस्थित नागरिकांनी मिळून १.२० लाख रुपयांची देणगी गोळा केली आहे. ही रक्कम केवळ तातडीची मदत म्हणून देण्यात आली. रमजाननंतर पुन्हा एकदा यावे, अशी विनंतीही या लोकांनी मोहिमेच्या आयोजकांना केली. जेणेकरून आणखी जास्त मदत निधी उभारता येईल.

आतापर्यंत सुमारे साडेचार कोटी रुपयांची रक्कम जमा झाली आहे. पण पूर्ण उद्दिष्ट गाठणे अजूनही बाकी आहे. अनिकाचे आई-वडील गेल्या तीन-चार महिन्यांपासून शर्थीचे प्रयत्न करत आहेत. त्यांनी प्रसिद्ध व्यक्ती, राजकारणी, उद्योगपती आणि समाजसेवकांकडे मदतीची याचना केली आहे. अनिकाच्या आईने भारतीय क्रिकेट संघाचा कर्णधार रोहित शर्मालाही आपल्या मुलीचा जीव वाचवण्याचे आवाहन केले होते. तरीही आतापर्यंत जमा झालेली मदत एकूण गरजेच्या निम्मीच आहे.

अनिकाच्या उपचारातील आणखी एक मोठे आव्हान तिच्या वजनाचे आहे. तिचे वजन साडेतेरा किलोपर्यंत पोहोचण्याआधीच हा उपचार होणे अत्यंत गरजेचे आहे. डॉक्टरांच्या मते, मुलीचे वजन या मर्यादेच्या आत असेल तरच इंजेक्शन देता येईल. सध्या अनिकाचे वजन साडेदहा किलो आहे. येत्या एक ते दीड महिन्यात तिचे वजन साडेतेरा किलोपर्यंत पोहोचण्याची शक्यता आहे. या काळात आई-वडिलांनी अनिकाच्या आहारावर विशेष लक्ष दिले आहे. तिचे वजन नियंत्रणात राहावे आणि उपचाराची वेळ हातून निसटू नये, याची ते पुरेपूर काळजी घेत आहेत. त्यांनी तिला पोळी आणि भात देणे बंद केले आहे. त्याऐवजी तिला केवळ दूध, फळांचा रस आणि फळे दिली जात आहेत.

आता अनिकाच्या आई-वडिलांनी इंदूरमधील सर्व शाळांना एक भावनिक आवाहन केले आहे. शहरातील साडेचार लाख विद्यार्थ्यांनी प्रत्येकी केवळ शंभर रुपयांची मदत केली, तर उर्वरित साडेचार कोटी रुपये सहज उभे राहू शकतात. या मोहिमेमुळे समाजात एकता आणि माणुसकीचा मोठा संदेश पोहोचला आहे. माणुसकीचा प्रश्न निर्माण होतो, तेव्हा द्वेष आणि भेदभावाला अजिबात थारा नसतो. लोकांच्या हृदयात दया आणि करुणा आजही जिवंत आहे, हे संपूर्ण शहराने मिळून दाखवून दिले आहे.

हे अभियान आता केवळ पैसे गोळा करण्यापुरते मर्यादित राहिलेले नाही. हा एक सामाजिक चळवळीचा भाग बनला आहे. यामुळे प्रत्येक वर्ग, समुदाय आणि धर्माचे लोक एकमेकांशी जोडले जात आहेत. खरी ताकद माणुसकीतच असते, याची जाणीव ही मोहीम करून देते. लोकांनी एकजुटीने काम केल्यास कोणतेही ध्येय अशक्य नसते. अंतःकरणातील दानशूरपणा आणि एकजूट कोणत्याही मोठ्या संकटावर मात करू शकते, ही मोठी शिकवण अनिकाच्या या संघर्षाने समाजाला दिली आहे. या मोहिमेने अनिकासाठी आशेचा नवा किरण निर्माण केला आहे. संपूर्ण समाजाच्या संवेदनशीलतेच्या आणि एकजुटीच्या बळावर कोणत्याही संकटाचा सामना करता येतो, हा मोलाचा संदेशही यातून मिळाला आहे.

जेव्हा एका चिमुकलीच्या जिवाचा प्रश्न येतो, तेव्हा माणुसकी हाच सर्वात मोठा धर्म बनतो. सर्वजण मदतीसाठी धावून येतात. हे सर्व वर्गांतील आणि समुदायांतील लोकांनी मिळून सिद्ध केले आहे. अनिकाला नवे जीवन देण्यासाठी या संपूर्ण शहराने आपले हृदय आणि मदतीचे हात पुढे केले आहेत. ही मोहीम यापुढेही प्रेम, दया आणि एकजुटीचा एक उत्तम आदर्श बनून राहील.