इब्राहिम खलिफे यांचा सत्कार करताना पोलिस निरीक्षक अमित यादव, सहायक पोलिस निरीक्षक दीपज्योती पाटील आणि पोलिस उपनिरीक्षक सुधीर उबाळे
मुंबई-गोवा महामार्गावर एका महिलेला लुटून तिला जखमी अवस्थेत सोडून देण्यात आले होते. अशा प्रसंगात माणुसकीचे दर्शन घडवत, राजापूर शहरातील रिक्षा व्यावसायिक इब्राहिम खलिफे यांनी त्या महिलेला मदत केली. त्यांच्या या सामाजिक बांधिलकीबद्दल राजापूर पोलिसांनी त्यांचा सत्कार केला.
दसऱ्याच्या पूर्वसंध्येला ही घटना घडली. मुंबई-गोवा महामार्गावर एका अज्ञात वाहनचालकाने लिफ्ट देण्याच्या बहाण्याने एका महिलेला लुटले. त्याने महिलेला मारहाण करून जखमी केले आणि रस्त्यावरच सोडून पळ काढला. या भरदिवसा घडलेल्या प्रकाराने परिसरात भीतीचे वातावरण पसरले.
शहरातील रिक्षाचालक इब्राहिम खलिफे हे भाडे सोडून परत येत होते. त्यावेळी त्यांना रस्त्याच्या कडेला एक महिला जखमी अवस्थेत दिसली. त्यांनी क्षणाचाही विलंब न लावता तिला रिक्षात बसवले. उपचारांसाठी त्यांनी तिला थेट राजापूर ग्रामीण रुग्णालयात दाखल केले. त्यांच्या या प्रसंगावधानाचे आणि सामाजिक बांधिलकीचे सर्व स्तरातून कौतुक होत आहे. इब्राहिम खलिफे यांनी दाखवलेली ही माणुसकी सर्वांसाठी एक आदर्श ठरत आहे.
इब्राहिम खलिफे यांच्या या कार्याची दखल घेत राजापूर पोलिसांनी त्यांचा सत्कार केला. पोलीस निरीक्षक अमित यादव आणि सहायक पोलीस निरीक्षक दीपज्योती पाटील यांच्या उपस्थितीत पोलीस उपनिरीक्षक सुधीर उबाळे यांनी खलिफे यांना सन्मानित केले. यावेळी पोलिसांनी नागरिकांना एक महत्त्वाचे आवाहन केले. मुंबई-गोवा महामार्गावर अपघात किंवा कोणताही अनुचित प्रकार घडल्यास नागरिकांनी पुढे येऊन मदत करावी, असे त्यांनी सांगितले.
