शेंझेन 

चायना मास्टर्स बॅडमिंटन स्पर्धेत भारताचा स्टार शटलर लक्ष्य सेन याचे खराब फॉर्ममधील सत्र सुरूच असून, तो पहिल्याच फेरीत पराभूत होऊन स्पर्धेतून बाहेर पडला आहे. मात्र, दुसरीकडे भारताचा अनुभवी खेळाडू किदाम्बी श्रीकांत आणि युवा शटलर तन्वी शर्मा यांनी सरळ गेममध्ये विजय मिळवत पुरुष आणि महिला एकेरीच्या दुसऱ्या फेरीत धडक मारली आहे. तसेच भारताची स्टार पुरुष दुहेरी जोडी सात्विकसाईराज रंकीरेड्डी आणि चिराग शेट्टी यांनीही विजयी सरबराई कायम ठेवली आहे.

माजी जागतिक अजिंक्यपद स्पर्धेतील कास्य पदक विजेता लक्ष्य सेन कॅनडाच्या विश्वविक्रमवीर व्हिक्टर लाईविरुद्धच्या सामन्यात पूर्णपणे संघर्ष करताना दिसला. अवघ्या ३८ मिनिटांत चाललेल्या या सामन्यात लक्ष्याला १४-२१, ७-21 अशा फरकाने पराभवाचा सामना करावा लागला. या कॅनेडियन खेळाडूविरुद्ध लक्ष्यचा हा तिसरा पराभव ठरला आहे. दुसरीकडे, किदाम्बी श्रीकांतने चायनीज ताईपेईच्या ची यू जेनकवर २१-१६, २१-१५ असा सहज विजय मिळवला. आता श्रीकांतची गाठ पुढील फेरीत व्हिक्टर लाईसोबत पडणार आहे.

तन्वी शर्मा आणि सात्विक-चिरागची घोडदौड

तैपेई ओपनमध्ये आपले पहिले बीडब्ल्यूएफ वर्ल्ड टूर विजेतेपद पटकावणाऱ्या १७ वर्षीय तन्वी शर्माने डेन्मार्कच्या अमाली शुल्झचा २१-१६, २१-१७ असा पराभव करत पुढची पायरी गाठली. आता तिची सामना जपानच्या टोमोका मियाजाकीशी होईल. पुरुष दुहेरीत सात्विकसाईराज रंकीरेड्डी आणि चिराग शेट्टी या सुवर्णपदक विजेत्या जोडीने मलेशियाच्या जुनाइदी अरिफ आणि कांग खाई झिंग यांचा २१-११, २१-१६ असा पराभव केला. संमिश्र दुहेरीत ध्रुव कपिला आणि तनिषा क्रॅस्तो यांनीही थायलंडच्या जोडीवर मात करत पुढची फेरी गाठली. मात्र, देपिका सिहाग आणि रोहन कपूर-रुत्विका गद्दे यांच्या जोडीला पहिल्या फेरीत पराभवाचे तोंड पाहावे लागले.