टी-२० वर्ल्ड कप २०२६ चे आयोजन भारत आणि श्रीलंकेत होत असताना, त्यातील नियोजनावरून आता वादाचा धूर उडाला आहे. भारताचे माजी दिग्गज खेळाडू सुनील गावस्कर आणि रवी शास्त्री यांनी आयसीसीच्या (ICC) या नियोजनावर अत्यंत कडक शब्दांत टीका केली आहे. विशेषतः खेळाडूंच्या प्रवासाचे वेळापत्रक आणि सरावासाठी मिळणाऱ्या अपुऱ्या सोयींवरून हे दोन्ही दिग्गज संतापले आहेत.

सुनील गावस्कर यांनी आयसीसीच्या व्यावसायिक भूमिकेवर प्रश्नचिन्ह उपस्थित केले. "तुम्हाला खरोखर अशा मनोरंजनाची गरज आहे का?" असा सडेतोड प्रश्न त्यांनी विचारला. त्यांच्या मते, वेळापत्रक अशा प्रकारे आखले गेले आहे की, खेळाडूंना एका शहरातून दुसऱ्या शहरात जाण्यासाठीच जास्त वेळ खर्च करावा लागत आहे. यामुळे खेळाडूंना पुरेसा आराम आणि सराव मिळत नाही. केवळ प्रेक्षक आणि उत्पन्नाचा विचार करताना खेळाडूंच्या शारीरिक स्थितीकडे दुर्लक्ष करणे चुकीचे असल्याचे त्यांनी स्पष्ट केले.

रवी शास्त्री यांनीही गावस्कर यांच्या सुरात सूर मिसळत आयसीसीच्या या अजब नियोजनावर ताशेरे ओढले. शास्त्रींच्या मते, वर्ल्ड कपसारख्या मोठ्या स्पर्धेत खेळाडूंची कामगिरी सर्वोत्तम असणे गरजेचे असते. पण जर खेळाडू विमानानेच फिरत राहणार असतील, तर ते मैदानात शंभर टक्के कसे देऊ शकतील? "हे कसले नियोजन? अशा कठीण परिस्थितीत खेळाडूंकडून चांगल्या खेळाची अपेक्षा करणे हा त्यांचा छळ आहे," अशा शब्दांत शास्त्री यांनी आपली नाराजी व्यक्त केली.

विमानतळांवरील तासनतास होणारी प्रतीक्षा आणि वेगवेगळ्या हवामानातील बदल यामुळे खेळाडूंना थकवा जाणवत आहे. अनेक संघांनी यापूर्वीच अशा अव्यवस्थेबद्दल तक्रारी केल्या आहेत. सरावाच्या मैदानांची स्थिती आणि खेळाडूंच्या मुक्कामाची ठिकाणे यात असलेल्या अंतरामुळेही खेळाडू त्रस्त आहेत.

सुनील गावस्कर आणि रवी शास्त्री यांच्यासारख्या जागतिक क्रिकेटमधील मोठ्या नावांनी उघडपणे टीका केल्यामुळे आता आयसीसीवर दबाब वाढला आहे. स्पर्धेचा दुसरा टप्पा सुरू होण्यापूर्वी या त्रुटी सुधारणे आयसीसीसाठी मोठे आव्हान असणार आहे. खेळाच्या नावाखाली खेळाडूंचे हाल होऊ नयेत, अशीच भावना सर्वच क्रिकेट चाहत्यांमधून व्यक्त होत आहे.