भारतीय महिला कबड्डी संघाने आपल्या दमदार कामगिरीच्या जोरावर सलग दुसऱ्यांदा 'महिला कबड्डी विश्वचषक' जिंकून नवा इतिहास रचला आहे. सोमवारी, २४ नोव्हेंबर रोजी ढाका येथे झालेल्या अटीतटीच्या अंतिम सामन्यात भारताने चायनीज तैपेईचा (Chinese Taipei) ३५-२८ अशा फरकाने पराभव केला. या विजयासह भारताने जागतिक कबड्डीवर आपले निर्विवाद वर्चस्व पुन्हा एकदा सिद्ध केले आहे.
भारताची या स्पर्धेतील कामगिरी सुरुवातीपासूनच अत्यंत प्रभावी होती. साखळी फेरीत (group matches) भारताने सर्व सामने जिंकून उपांत्य फेरीत धडक मारली होती. उपांत्य फेरीत भारताचा सामना बलाढ्य इराणशी झाला. तिथेही भारतीय महिलांनी आपला धडाका कायम ठेवत इराणला ३३-२१ अशा फरकाने पराभूत केले आणि अंतिम फेरी गाठली.
दुसरीकडे, चायनीज तैपेई संघानेही साखळी फेरीत अपराजित राहून अंतिम फेरी गाठली होती. त्यांनी उपांत्य फेरीत यजमान बांगलादेशला २५-१८ ने नमवले होते. त्यामुळे अंतिम सामना अत्यंत चुरशीचा होईल अशी अपेक्षा होती. मात्र, भारताने अंतिम सामन्यात आपला अनुभव आणि संयम पणाला लावत तैपेईचे आव्हान परतवून लावले आणि सलग दुसऱ्यांदा विश्वचषक उंचावला.
पंतप्रधानांकडून कौतुक
या ऐतिहासिक विजयानंतर पंतप्रधान नरेंद्र मोदी यांनी भारतीय महिला संघाचे अभिनंदन केले आहे. त्यांनी 'X' वर पोस्ट केले: "कबड्डी विश्वचषक २०२५ जिंकून देशाचा अभिमान वाढवल्याबद्दल आपल्या भारतीय महिला कबड्डी संघाचे अभिनंदन! त्यांनी उत्कृष्ट जिद्द, कौशल्य आणि समर्पण दाखवले आहे. त्यांचा हा विजय असंख्य तरुणांना कबड्डी खेळण्यासाठी, मोठी स्वप्ने पाहण्यासाठी आणि उंच ध्येय गाठण्यासाठी प्रेरित करेल."
.jpg "प्रातिनिधिक फोटो")
.jpg "प्रातिनिधिक फोटो")
.jpg "चीनमध्ये अडकलेली अरुणाचली महिला")
