आर्लिंग्टन
अर्जेंटिनाचा स्टार फुटबॉलपटू लिओनेल मेस्सीने पुन्हा एकदा विश्वविक्रमाला गवसणी घातली आहे. शनिवारी रात्री झालेल्या फिफा वर्ल्ड कपमधील जॉर्डनविरुद्धच्या सामन्यात गोल करत, सलग ७ वर्ल्ड कप सामन्यांत गोल करणारा तो जगातील पहिला खेळाडू ठरला आहे. अर्जेंटिनाने हा सामना ३-१ असा जिंकला.
वयाची ३९ वर्षे पूर्ण झाल्यानंतरच्या पहिल्याच सामन्यात मेस्सीने आपल्या कौशल्याची चुणूक दाखवली. दुसऱ्या सत्रात बदली खेळाडू म्हणून मैदानावर उतरलेल्या मेस्सीने ८० व्या मिनिटाला फ्री-किकद्वारे गोल केला. चेंडूने दोन बचावपटूंना चकवून थेट जाळ्यात प्रवेश केला. हा त्याच्या कारकिर्दीतील ७२ वा फ्री-किक गोल आणि १२३ वा आंतरराष्ट्रीय गोल ठरला. या विक्रमासह मेस्सीने जस्ट फॉन्टेन आणि जायरझिनो यांना मागे टाकले आहे.
अर्जेंटिनाने याआधीच ग्रुप जे (Group J) मध्ये अव्वल स्थान निश्चित केले होते, त्यामुळे या सामन्यात मेस्सीला विश्रांती देण्यात आली होती. मात्र, चाहत्यांच्या प्रचंड गर्दीमुळे ६० व्या मिनिटाला तो मैदानावर उतरला. याआधी लो सेल्सो आणि लाउतारो मार्टिनेझ यांनी गोल करून अर्जेंटिनाला आघाडी मिळवून दिली होती. अर्जेंटिनाचा हा विजय स्पर्धेतील त्यांचा दबदबा दर्शवणारा आहे.
या स्पर्धेत मेस्सीने आतापर्यंत सहा गोल केले आहेत. हॅमस्ट्रिंगच्या किरकोळ दुखापतीमुळे स्पर्धेच्या सुरुवातीला तो काहीसा संथ होता, मात्र आता पूर्ण तंदुरुस्त असलेला मेस्सी गोलचा पाऊस पाडत आहे. अर्जेंटिनाचा बाद फेरीतील प्रवास आता दक्षिण फ्लोरिडामध्ये सुरू होणार आहे.
.jpeg)
