भारताने जागतिक बॉक्सिंगच्या इतिहासातील आपली सर्वोत्तम कामगिरी नोंदवली आहे. वर्ल्ड बॉक्सिंग कप फायनल्स २०२५ च्या अंतिम दिवशी भारताने तब्बल नऊ सुवर्णपदकांची कमाई केली. शहीद विजय सिंह पथिक स्पोर्ट्स कॉम्प्लेक्समध्ये घरच्या प्रेक्षकांच्या प्रचंड उत्साहात भारताने हा ऐतिहासिक पराक्रम गाजवला.

ऑलिम्पिक-श्रेणीतील महत्त्वाच्या गटांमध्ये भारतीय महिलांनी वर्चस्व गाजवत ऐतिहासिक कामगिरी केली, तर पुरुषांच्या गटात दोन सुवर्णपदकांनी यजमान देशाच्या यशस्वी मोहिमेत भर घातली. बॉक्सिंग फेडरेशन ऑफ इंडियाच्या (BFI) प्रसिद्धीपत्रकानुसार, भारताने या स्पर्धेत नऊ सुवर्ण, सहा रौप्य आणि पाच कांस्यपदकांसह मोहीम संपवली. विशेष म्हणजे, स्पर्धेत सहभागी झालेल्या प्रत्येक २० भारतीय बॉक्सर्सनी पदक जिंकले.

अंतिम दिवस भारतीय महिलांनी गाजवला. दुपारच्या सत्रात मीनाक्षी (४८ किलो), प्रीती (५४ किलो), अरुंधती चौधरी (७० किलो) आणि नुपूर (८०+ किलो) यांनी प्रत्येकी एक सुवर्णपदक जिंकले. सायंकाळच्या सत्रात निखत जरीन (५१ किलो), जास्मिन लांबोरिया (५७ किलो) आणि परवीन (६० किलो) यांनी सुवर्णपदकाला गवसणी घातली. लॉस एंजेलिस ऑलिम्पिकमध्ये वजन गटांमध्ये महिला आणि पुरुषांना समान संधी मिळणार आहे. अशा वेळी भारतीय महिलांचे हे वर्चस्व जागतिक बॉक्सिंगमध्ये भारताची वाढती ताकद अधोरेखित करते.

सुवर्णपदक जिंकल्यावर मीनाक्षी हुडाने एएनआयला सांगितले, "हे पदक फक्त माझे नाही. हे संपूर्ण भारताचे पदक आहे. हे माझ्या संघाचे पदक आहे. मी कठोर प्रशिक्षण सुरू ठेवेन. मी देशाला अभिमान वाटेल अशी कामगिरी करेन. हे वर्ष माझ्यासाठी खूप चांगले होते. हे माझ्या आयुष्यातील सर्वोत्तम वर्ष होते."

नुपूर शेओरान म्हणाली, "भारताने आयोजित केलेल्या या स्पर्धेबद्दल मी सांगू इच्छिते की, आम्ही ३ वर्ल्ड कप आणि वर्ल्ड चॅम्पियनशिपमध्ये सहभागी झालो आहोत. लिव्हरपूलसह कुठेही आम्हाला अशा सुविधा मिळाल्या नाहीत. बक्षीस रक्कम आयबाकडून (AIBA) आहे आणि ही वर्ल्ड बॉक्सिंगकडून आहे. मी ठीक आहे. मी नुकतेच सुवर्णपदक जिंकले आहे आणि मला बरे वाटत आहे. पण हो, बक्षीस रक्कम सर्वांनाच आवडते."

निखत जरीनने एएनआयला सांगितले, "मला पूर्वीच्या यशाची आठवण झाली आणि आज घरच्या प्रेक्षकांसमोर अंतिम सामना जिंकून मला आनंद झाला. खूप मोठ्या विश्रांतीनंतर मी माझ्या सुवर्ण प्रवासाला पुन्हा सुरुवात करू शकले, याचा मला आनंद आहे. मी कठोर मेहनत करत राहीन आणि सुवर्णपदके जिंकून भारताला गौरव मिळवून देण्याचा प्रयत्न करेन."

सायंकाळचे मुख्य आकर्षण ठरली ती विश्वविजेती जास्मिन लांबोरिया. तिने पॅरिस ऑलिम्पिक पदक विजेत्या वू शिह यी हिला ४:१ ने हरवून एक मोठा विजय मिळवला. तिने सुरुवातीपासूनच आपला ताळमेळ साधला आणि प्रतिस्पर्धीवर दडपण आणले. दोन वेळची विश्वविजेती निखत जरीनने चायनीज तैपेईच्या गुओ यी झुआनला ५:० ने सहज हरवले, तर परवीनने जपानच्या अयाका तागुचीवर ३:२ ने विजय मिळवला.

तत्पूर्वी, दिवसाची सुरुवात मीनाक्षीने केली. तिने आशियाई विजेत्या फरझोना फोझिलोव्हावर ५:० असा शानदार विजय मिळवला. तिच्या वेगवान हालचाली, अचूक ठोसे आणि भक्कम बचावाने पहिल्या फेरीपासूनच सामन्यावर नियंत्रण ठेवले. त्यानंतर प्रीतीने इटलीच्या वर्ल्ड चॅम्पियनशिप पदक विजेत्या सिरिन चरबीला ५:० ने पराभूत केले.

अरुंधती चौधरीने १८ महिन्यांनंतर पुनरागमन करत उझबेकिस्तानच्या अझिझा झोकिरोव्हावर ५:० असा निर्णायक विजय मिळवला. नुपूरने उझबेकिस्तानच्या सोतिंबोएव्हा ओल्टिनॉयवर ३:२ अशा चुरशीच्या लढतीत विजय मिळवत आपले पहिले वर्ल्ड बॉक्सिंग कप फायनल्सचे विजेतेपद पटकावले.

पुरुषांमध्ये सचिन (६० किलो) याने किर्गिस्तानच्या मुनारबेक उलू सेइतबेकवर ५:० असा निर्दोष विजय मिळवला. अंतिम सामन्यांमधील सर्वात नाट्यमय विजय हितेशने (७० किलो) मिळवला. त्याने कझाकस्तानच्या नुरबेक मुरसलवर सुरुवातीला पिछाडीवर असूनही ३:२ ने विजय मिळवला. दुसऱ्या आणि तिसऱ्या फेरीत जोरदार पुनरागमन करत त्याने हा विजय खेचून आणला.

हितेश गुलियाने आपल्या अंतिम लढतीबद्दल सांगितले, "मी पहिला राऊंड ४-१ ने गमावला होता. तो [नुरबेक मुरसल] एक चांगला बॉक्सर आहे. तो लांबून खेळत होता. त्यामुळे मला त्याच्या थोडं पुढे जाऊन खेळावं लागलं. हे मला पहिल्या फेरीतच समजलं. म्हणून मी दुसऱ्या फेरीत आघाडी घेतली, ती फेरी ३-२ अशी होती. त्यामुळे मला तिसऱ्या फेरीत सर्वस्व पणाला लावावं लागलं. जर ती फेरी ५-० झाली असती, तर मी हरलो असतो. म्हणून मी तिसऱ्या फेरीत पूर्ण ताकदीने उतरलो."

सुवर्णपदक विजेता सचिन म्हणाला, "मी माझ्या उणिवांवर लक्ष केंद्रित केले. त्यावर लक्ष केंद्रित करून मी माझा सराव वाढवला. मी माझे आक्रमण आणि पायांच्या हालचाली वाढवल्या. माझ्याकडून काही चुका झाल्या, पण एकूणच मी १००% तयार होतो."

याशिवाय, भारताच्या जादुमणी सिंह (५० किलो), पवन बर्तवाल (५५ किलो), अभिनाश जमवाल (६५ किलो) आणि अंकुश फंगल (८० किलो) यांनी रौप्य पदके जिंकली. नरेंदर बेरवालला (९०+ किलो) उझबेकिस्तानच्या खलिमजोन मामासोलिव्हकडून ५:० ने पराभव पत्करावा लागला आणि त्याला रौप्यपदकावर समाधान मानावे लागले. महिलांच्या ८० किलो वजनी गटाच्या अंतिम फेरीत पूजा राणीला वर्ल्ड बॉक्सिंग कप पदक विजेत्या अगाता काझमार्स्काकडून पराभव पत्करावा लागला.

भारताच्या ऐतिहासिक सुवर्णपदकांच्या पलीकडे, इतर अंतिम सामन्यांमध्ये अनेक जागतिक शक्तींनी उत्कृष्ट कामगिरी केली. ऑस्ट्रेलियाच्या एम्मा-स्यु ग्रीनट्रीने महिलांच्या ७५ किलो वजनी गटाच्या अंतिम फेरीत इटलीच्या मेलिसा जेमिनीवर ५:० असा प्रभावी विजय मिळवला. तर चायनीज तैपेईच्या ऑलिम्पिक पदक विजेत्या चेन निएन-चिनने महिलांच्या ६५ किलो वजनी गटात ४:१ ने विजय मिळवला.

उझबेकिस्तानने अनेक विभागांमध्ये वर्चस्व गाजवले. असिलबेक जलीलोव्ह (५० किलो), समंदर ओलिमोव्ह (५५ किलो), जावोखिर अब्दुरखिमोव्ह (७५ किलो) आणि मामासोलिएव्ह (९०+ किलो) यांनी सुवर्णपदके जिंकली. इंग्लंडने दोन विजेतेपदं साजरी केली—शिट्टू ओलादिमेजीने ८० किलो वजनी गटात अंकुशला हरवले आणि आयझॅक ओकोहने ९० किलो वजनी गटाचा मुकुट पटकावला. जपानच्या शिओन निशियामाने पुरुषांच्या ६५ किलो वजनी गटाच्या अंतिम फेरीत ४:१ ने विजय मिळवला आणि कझाकस्तानच्या सुलतानबेक ऐबारुलीने पुरुषांच्या ८५ किलो वजनी गटात अव्वल स्थान पटकावले.