हाँगकाँग

हाँगकाँगच्या ताई पो परिसरात बुधवारी दुपारी लागलेल्या भीषण आगीत किमान ४४ जणांचा मृत्यू झाला आहे. गेल्या ६३ वर्षांतील ही हाँगकाँगची सर्वात भीषण आग मानली जात आहे. आगीने अनेक उत्तुंग इमारतींना वेढले असून, अद्यापही अग्निशमन दलाचे जवान आगीशी झुंज देत आहेत.

आगीची सुरुवात बुधवारी स्थानिक वेळेनुसार दुपारी २:५१ च्या सुमारास वांग फुक कोर्ट या गृहसंकुलात झाली. हे संकुल १९८३ मध्ये बांधले गेले असून त्यात ८ इमारती आणि १,९८४ फ्लॅट्स आहेत. स्थानिक माध्यमांनुसार, यातील सात इमारतींना आगीची झळ बसली आहे.

आग कशी पसरली?

आगीची सुरुवात इमारतीबाहेर लावलेल्या बांबूच्या मचान वरून झाली. नूतनीकरणाचे काम सुरू असल्याने इमारतींना बांबूच्या मचानांनी आणि हिरव्या रंगाच्या बांधकाम जाळीने झाकले होते. हे साहित्य अत्यंत ज्वलनशील असल्याने आगीने काही मिनिटांतच रौद्र रूप धारण केले. आगीच्या ज्वाळा इमारतीच्या बाहेरून वेगाने वर चढल्या आणि जवळच्या इमारतींनाही आपल्या कवेत घेतले. वारा आणि मोकळ्या जागेमुळे आग आणखी भडकली.

दुपारी ३:३४ पर्यंत आगीने 'लेव्हल ४' आणि संध्याकाळी ६:२२ पर्यंत 'लेव्हल ५' (सर्वोच्च अलर्ट पातळी) गाठली.

जीवितहानी आणि बेपत्ता नागरिक

अधिकाऱ्यांनी ४४ मृत्यूंना दुजोरा दिला असून, यात एका अग्निशमन जवानाचाही समावेश आहे. धक्कादायक म्हणजे, सुमारे २७९ रहिवासी अजूनही बेपत्ता आहेत. ६६ जणांना रुग्णालयात दाखल करण्यात आले असून, त्यापैकी १७ जणांची प्रकृती चिंताजनक आहे. सुमारे ९०० लोकांनी कम्युनिटी सेंटर्समध्ये आश्रय घेतला आहे.

कठोर कारवाई

पोलिसांनी बांधकाम कंपनीच्या दोन संचालकांना आणि एका अभियांत्रिकी सल्लागाराला अटक केली आहे. "कंपनीच्या प्रभारींनी घोर निष्काळजीपणा केल्याचे मानण्यास कारण आहे," असे वरिष्ठ पोलीस अधीक्षक आयलीन चुंग यांनी सांगितले. खिडक्यांवर स्टायरोफोम आणि बाहेर आगप्रतिबंधक नसलेली जाळी वापरल्याचे तपासात समोर आले आहे. ही दुर्घटना १९६२ नंतरची हाँगकाँगची सर्वात प्राणघातक आग आहे. तेव्हा शम शुई पो जिल्ह्यात ४४ लोक मारले गेले होते.