इराणमध्ये इंधन दरवाढीवरून आणि आर्थिक परिस्थितीवरून भडकलेल्या आंदोलनांच्या पार्श्वभूमीवर राष्ट्रपती मसूद पेझेशकियान यांनी महत्त्वाची भूमिका घेतली आहे. रविवारी त्यांनी निदर्शकांशी थेट चर्चा करण्याची तयारी दर्शवली. मात्र, त्याच वेळी त्यांनी एक कडक इशाराही दिला आहे. सरकार चर्चेसाठी तयार असले, तरी सार्वजनिक मालमत्तेचे नुकसान करणाऱ्या आणि हिंसाचार पसरवणाऱ्या दंगेखोरांना अजिबात खपवून घेतले जाणार नाही, असे त्यांनी स्पष्ट केले आहे.
गेल्या काही दिवसांपासून इराणमधील विविध शहरांमध्ये सरकारविरोधी निदर्शने तीव्र झाली आहेत. यावर प्रतिक्रिया देताना राष्ट्रपती पेझेशकियान यांनी मंत्रिमंडळाच्या बैठकीत आपली भूमिका मांडली. "आम्ही लोकांच्या तक्रारी आणि टीका ऐकून घेण्यास तयार आहोत. कायदेशीर मार्गाने आंदोलन करणाऱ्यांशी चर्चा करण्यास आमचा विरोध नाही. परंतु, टीका करणे आणि दंगल घडवणे या दोन पूर्णपणे वेगळ्या गोष्टी आहेत," असे त्यांनी नमूद केले.
देशात निर्माण झालेल्या या अस्थिरतेमागे परकीय शक्तींचा हात असल्याचा आरोपही राष्ट्रपतींनी केला. "काही लोक आमच्या देशाच्या शत्रूंच्या तालावर नाचत आहेत. त्यांना इराणची सुरक्षा आणि शांतता धोक्यात आणायची आहे. अशा लोकांना ओळखून त्यांच्यावर कठोर कारवाई केली जाईल," असे त्यांनी सांगितले. आंदोलनांच्या नावाखाली सार्वजनिक मालमत्तेची जाळपोळ करणे किंवा रस्ते अडवणे हे कोणत्याही परिस्थितीत स्वीकारले जाणार नाही, असे प्रशासनाने स्पष्ट केले आहे.
शनिवारी रात्री उशिरापर्यंत तेहरानसह अनेक प्रमुख शहरांमध्ये निदर्शने सुरू होती. विद्यापीठांमधील विद्यार्थ्यांनीही या आंदोलनात सहभाग नोंदवला आहे. काही ठिकाणी पोलिसांशी चकमकी झाल्याच्या बातम्याही समोर आल्या आहेत. महागाई आणि बेरोजगारीमुळे त्रस्त झालेल्या जनतेचा रोष रस्त्यावर दिसत आहे. या परिस्थितीचा फायदा घेऊन काही समाजकंटक हिंसाचार पसरवत असल्याचा दावा सरकारने केला आहे.
पेझेशकियान यांनी सुरक्षा दलांना संयम पाळण्याचे आवाहन केले आहे, पण त्याच वेळी कायदा आणि सुव्यवस्था मोडणाऱ्यांवर कडक कारवाई करण्याचे आदेशही दिले आहेत. "लोकांच्या जीविताचे आणि मालमत्तेचे रक्षण करणे ही आमची प्राथमिकता आहे. त्यामुळे अराजकता पसरवणाऱ्यांना मोकळे रान दिले जाणार नाही," असे त्यांनी स्पष्ट शब्दांत सांगितले. सरकार लवकरच आर्थिक सुधारणांबाबत काही निर्णय घेणार असल्याचेही संकेत त्यांनी दिले आहेत.
.webp "पश्चिम बंगालमधील हुगळी जिल्ह्यातील दादपूर येथील पोइनानमध्ये पार पडलेल्या जागतिक इज्तेमातील दृश्य")
.jpg "सरकारविरोधी घोषणांनी रस्ते दुमदुमले")
